黃耀明醒目救劉以達一命

由黃耀明及劉以達組成的達明一派，前晚假紅館舉行一連三場《達明卅一派對演唱會》頭場，他們落力表演期間發生了小意外。唱到《十個救火的少年》時，兩人要留在升降台待升上去，劉以達卻蝦碌忘記走位，打算踏出已緩緩升起的升降台，黃耀明見狀即時提點，令劉以達不致「撻成一塊」。

兩度甩嘴重唱

唱完《今天應該很高興》後，黃耀明說：「我哋1984年認識，之後組成達明一派，三十幾年嚟香港經歷好多動盪時刻，每逢過時過節諗起呢首歌，諗起我哋今日仲應唔應該為呢個城市高興。但係應該高興嘅，因為我哋仲站着，未被打垮、冇被消失。」其後他演繹《下落不明》竟甩嘴，要求重新再唱。此時，全黑打扮的嘉賓何韻詩出場，兩人合唱David Bowie的《Under Pressure》，之後黃耀明讀出一封向David Bowie致敬的信：「對於我哋呢啲異類嚟講，你就係撐住我哋嘅一把傘。」未料他跟着唱出《剎那天地》，一開始又甩嘴叫停，又要重唱，認真老貓燒鬚！

劉以達（左）幾乎踏出升降台，幸被黃耀明叫停。

何韻詩與換上報紙紙袋造型的達明一派合唱。

要支持兄弟幫

Encore時劉以達Solo唱出《排名不分先後左右忠奸》，並叫大家支持黃耀明：「企喺我隔籬係我兄弟幫，好多嘢要支持佢，你哋支唔支持佢？」大家即熱烈鼓掌。由於兩人眼上畫有星星圖案，黃耀明指造型是扮David Bowie：「揀咗首對佢好重要嘅歌——《Heroes》，喺一個咁嘅年代，唔好靠人哋帶畀我哋幸福，世界冇Heroes，每人要做自己嘅Heroes。」第二次Encore時，黃耀明說27日達明一派就31歲，感謝大家給了他們美好的30年，最後以《石頭記》作結。

有去睇騷的盧凱彤在網上表示跟達明一派同年同月同日生，15歲認識他們後便再沒分開過，何韻詩亦大讚是「本年度最強紅館演唱會」。

文：音樂組