碧咸連踩四場送大禮
前英國球星「萬人迷」碧咸日前於上海出席代言的友邦保險（AIA）活動後，昨日旋風式襲港，一日連走幾場完全唔覺攰，早上玩驚喜先後到九龍灣一商業大廈及灣仔AIA大樓參觀，下午再轉到中環海濱公共空間，出席AIA「萬人迷X MDRT（百萬圓桌會）5000誓師大會」，大會抽獎送出碧咸的簽名禮物！
為友邦保險擔任全球大使的碧咸（David Beckham）獲邀來港，雖然剛從上海飛抵香港，但昨日早上他已西裝骨骨「出巡」連踩兩場，首先去了九龍灣一商業大廈，之後現身位於灣仔的友邦大廈與員工見面，出席簡單的分享會，全程笑容滿面，似乎未有因家鄉英國倫敦遭受恐怖襲擊而影響心情。
食過午餐後，下午二時五十分碧咸現身活動，雖然僅逗留23分鐘但已令全場瘋狂！碧咸出場與大家打招呼後，自言相信AIA理念，好開心與對方合作，認為照顧好自己、家人與朋友的理念好重要！雖然成日健身，但廿四孝老竇的他稱覺得湊小朋友去吓公園、放吓狗，這些生活「小事」比食咩、飲咩及做幾多運動更重要！
「愛的宣言」引發尖叫
至於與多位保險公司領導層同場，碧咸講到從小認為父母是偉大的領袖，好仰慕他們，又稱踢波多年遇過好多好好的領隊，跟好多偉大隊長及球員合作，但他相信一個領袖最重要是有團隊支持，團隊合作最重要！他又講到有天分是好事，但勤力才是王道，所以他掛靴後，於生意及照顧家庭上好努力，希望子女當自己是榜樣！
講到不時四圍遊，自認「吃貨」的碧咸稱好幸運可以周圍食嘢，跟子女一樣最愛意大利菜，好彩子女亦鍾意食他下廚的意粉！他亦提到鍾意食內地餃子及烤鴨，對於香港，他稱樣樣都鍾意，最愛大家的活力並高呼：「I Love Hong Kong！」令全場High爆尖叫！大會最後抽獎送出六份碧咸的簽名禮物，全場大合照後，他親民到盡行到台前與保險從業員握手，晒盡魅力！出席活動後，碧咸嫌唔夠喉由中環轉往灣仔會展睇藝術展，一向鍾意藝術的他未知有否買得心頭好？
文：外娛組
攝：追蹤組