美國總統特朗普（Donald Trump）一向與眾多荷里活名人紅星「唔妥」，原來連「風馬牛不相及」的英國著名男子組合One Direction（1D）亦與他有「過節」！最近1D成員Liam Payne受訪時大爆，1D曾經因為拒見特朗普的女兒，而被對方趕出旗下的酒店！
1D仔Liam最近登上雜誌《Rollercoaster》封面並接受訪問，他在訪問中大爆1D曾與美國總統特朗普有「過節」！Liam說：「特朗普試過有次趕我哋（1D）出佢嘅酒店，信不信由你，件事係同佢女兒見面有關。有次佢打畀我哋嘅經理人，而我哋嗰陣喺佢紐約一間酒店瞓緊覺，佢當時叫經理人叫醒我哋，話個女想見我哋，我當時嘅反應就係：『唔好啩！』之後佢就唔准我哋用佢酒店嘅地下停車場。」Liam繼續暗寸特朗普在紐約玩晒，他說：「好明顯喺紐約，我哋唔可以外出走走，因為紐約對我哋好無情。」
Liam指特朗普被拒之後嬲嬲豬，最後更不想1D住在旗下的酒店，令眾子被迫退房：「佢就好似：『既然係咁，我唔想你哋住喺我酒店』，所以我哋最後只好退房離開！」雖然Liam無開名指特朗普哪個女想見他們，但由於特朗普的大女伊萬卡（Ivanka Trump）年紀唔細已經35歲，所以23歲細女蒂法尼（Tiffany Trump）想見1D的成數較高！經網上翻查資料，發現2012年當時仍有5名成員的1D被fans拍到在特朗普旗下的酒店退房，因而被懷疑正是Liam口中被特朗普下逐客令一事！到目前為止，一向出名「方丈」性格的特朗普未有在社交網回應Liam的指控。
除了1D與特朗普有「過節」外，特朗普日前亦在社交網回應黑人饒舌男歌手Snoop Dogg在新MV中用槍指住模仿他的小丑，他留言說：「你可以想像一下如果事業失敗嘅Snoop Dogg瞄準奧巴馬總統，並向佢開槍嘅後果會係點？一定坐監啦！」不過，其實特朗普並非對個個artists都有仇，好似加拿大老牌搖滾男歌手Neil Young，就獲特朗普推崇，2006年他在訪問中大讚Neil，表示聽他的歌曲多年外，更讚他聲線完美。
文：外娛組