「90後」美籍華裔女星汪可盈（Chloe Bennet）近年憑超英劇《神盾局特工》人氣急升，身形輸在起跑線的她靠甜美笑容與率真搞鬼性格突圍，早前更為平權而大膽批評名模，勁貼地獲粉絲Like爆！
現年24歲的汪可盈生於美國，15歲搬到內地發展歌唱事業，能講流利英語與普通話的她曾推出雙語單曲《Uh Oh》，後來回歸洛杉磯並改名Chloe Bennet加入「公仔箱」，先後拍下青春劇集如《The Nightlife》與《Nashville》。2012年加盟漫威（Marvel）超英劇《神盾局特工》（Agents of S.H.I.E.L.D）的她，演黑客出身的超英特工，打得又睇得，戲份更愈來愈多，與主角Clark Gregg拍住上，火速升呢成人氣王，吸納大批亞洲粉絲，仲趁勢來華宣傳，成為劇集一大焦點！
汪可盈上位後，仍不吝嗇於社交網晒生活照，棄做工作狂的她不時分享與男友出遊的溫馨時刻。除此之外，仲有勁養眼的泳衣照晒青春氣息，健康性感又玩得，成為大眾甜姐兒！
有華裔血統的她更勇於發聲，早前美國一線索模Gigi Hadid瞇眼扮細眼相撲手，而被批評對亞洲人種族歧視，汪可盈即於社交網晒童年照並撰長文，自言不時會因有華裔血統而被開玩笑，兒時會當對方講笑以免被當小器，但長大後就另有體會：「我嘅價值唔係我嘅外表決定，而係由我嘅性格及點樣對待他人而來。又靚又有影響力嘅你（Gigi）咁歧視亞洲人，令我好傷心！」她更於文尾直言：「咁樣（扮細眼）唔會令你成為壞人或種族歧視者，但令人覺得你嘅行為好無知。」呼籲被取笑的亞洲人定義自身價值，為自己而感驕傲，敢言留言一出獲粉絲Like爆！
文：外娛組