趙哲妤唔做怨婦為單親發聲
早前誕下一女的單親媽媽趙哲妤（Uny）昨日為單親協會賣旗，她自爆曾被朋友帶到醫院墮胎，但她自信能獨力撫養女兒成人，並揚言母女的幸福不用靠男人。Uny表示初時曾掙扎是否參與今次賣旗活動，她解釋：「因為好似畀人標籤咗係單親，唔知係正面定負面，但與其做怨婦，不如為單親發聲。我廿幾歲未婚生仔，啲人覺得好淒涼，但我嘅堅強唔係大家可以想像到。」
單親家庭普遍
Uny慶幸沒有被歧視，但懷孕初期被朋友勸她把胎兒打掉：「我朋友捉我去醫院，佢話個小朋友會累死你，叫我落咗佢。如果我18歲冇經濟能力，我都可能會咁做，但我依家就快30歲，我有三個學位，如果我都冇能力，咁好多人都瞓街，小朋友嘅生命比我更重要。」Uny指單親家庭在港很普遍，她會教導小朋友將來如何面對，她說：「啲人話唔好做虎媽，畀子女開心成長，但我一個女人湊大個囡，要諗好多，要逼佢讀書，等佢叻至唔會畀人蝦。」
幸福不用靠男人
Uny更認為單親家庭經濟壓力較一般家庭大，問她是否有經濟壓力時，她笑言：「香港個個都有經濟壓力，小朋友每個月花五位數字，但我有積蓄所以Ok，等佢戒咗奶之後我可以去接多啲工作。（小朋友嘅生父有冇經濟支持？）有我都未必要，真係多謝晒佢，佢畀得幾多，我哋嘅幸福唔一定要靠佢。（佢要盡責任？）好明顯佢個膊頭唔知去咗邊，起碼我有膊頭。」
文：名人組