江美儀出錢幫單立文養「豹女」
江美儀日前與大班好友為單立文慶生，昨日她出席活動時自爆為此「冇咗第一次」，原來是指應單立文（豹哥）要求處女下海穿豹紋衫，上網訂豹紋褸的她到場後才發現與胡杏兒撞衫！她又透露自己以單立文名義助養兒童當生日禮物，搞到豹哥眼濕濕！
藝人江美儀昨日帶愛犬Teddy與Tina到大美督出席導盲犬活動。提到日前出席好友單立文的58歲生日Party，她笑稱為對方奉獻了「第一次」：「豹哥話我哋要着豹紋衫嚟，但係我屋企連豹紋底褲都冇！」她專誠為豹哥添置新衫，不過竟然與同場的胡杏兒撞衫：「我喺網上買咗件豹紋褸，點知去到就發現同杏兒撞咗，咁大個女第一次同人撞衫！」問到送了甚麼生日禮物？她透露用了豹哥名義助養兒童當作禮物：「佢老婆（胡蓓蔚）同我講，豹哥收到封信嗰陣眼濕濕呀！」事後，她接受電話訪問時補充，指受助兒童是內地小朋友：「係女仔嚟嘅。（之後都係你畀錢助養？）梗係我畀啦，一年一次，每次大約1,000蚊港幣。」
湊狗似湊B
提到她用孭帶攜兩隻愛犬出席活動，看似輕鬆的她自爆孭帶本來是人類BB專用：「湊狗好似湊仔咁，我都係買啲BB嘅嘢抱佢哋，起碼條腰骨冇咁傷。」又笑問記者能否分辨Teddy和Tina，然後開估指頭大的是哥哥Teddy，頭較細的是妹妹Tina：「Tina最惡，成日喺屋企吠，今朝先畀我鬧完咋！」她表示對家傭有特別要求：「我請工人嘅條件係唔使放狗，始終唔放心，寧願自己喺屋企嘅時候先同佢哋出街。」
文：影視組