克勤「垃圾袋」上身：我識條鐵咩！
李克勤前晚以香港主場身份，與日本、韓國、星馬地等歌手代表出席音樂節交流表演，為隆重其事，克勤太太盧淑儀特別為他準備價值五位數的戰衣上陣，但克勤卻以「垃圾袋」來形容戰衣：「Fashion嘅嘢我識條鐵咩！」擔任壓軸表演嘉賓的韓國人氣男團B1A4一出場即引起哄動，大批粉絲蜂擁衝上台前，魅力驚人！
前晚克勤應邀出席「香港亞洲流行音樂節」，同場有日本Love Psychedelico、韓國男團B1A4、馬來西亞「人氣女神」四葉草（朱主愛）、新加坡的郭美美、台灣的周湯豪，由四葉草率先登場表演，身穿短裙的她晒長腿，非常吸睛，大受歡迎的Love Psychedelico演出時贏得觀眾熱烈掌聲，而周湯豪就勁歌熱舞高唱《角頭》，到克勤登場時盡顯主場歌手風範，落台與觀眾握手，還與舞蹈員走到中間的小舞台勁唱Medley，全場High爆！
B1A4壓軸起高潮
韓國男團B1A4壓軸出場即掀起高潮，一眾粉絲衝向台前不斷尖叫，五子勁歌熱舞，又以廣東話請大家「大聲叫」，當司儀問他們喜歡香港哪位歌手，他們分別用廣東話及英文回答「方大同與陳奕迅」，又表示愛看電影《英雄本色》，成員孔燦更即場模仿周潤發的經典雙槍姿勢，令全場喪叫，臨尾他們又向台下粉絲大派禮物，粉絲陷入瘋狂爭住搶。
騷後穿上閃令令膠質大褸的克勤笑說：「你見我今日隆重其事就知係主場歌手打扮啦，呢啲Fashion嘅嘢我識條鐵咩！梗係老婆搞啦唔使問。我淨係知道張單好貴，好似個垃圾膠袋咁咋喎，都要五位數呀！」雖然他搞笑以垃圾袋形容膠質大褸，但卻說相信太太的品味，不過波衫就自己負責：「波衫波褲佢冇得出聲，我會話番佢：『你識條鐵咩？』」對於昔日寶麗金舊同事關淑怡日前涉嫌刑事恐嚇及普通襲擊被拘捕一事，克勤坦言不甚清楚：「又唔知問邊個，唔係好方便亂問，我唔似一個八公，都係睇新聞知。」他希望對方快點沒事。
「亞洲超級新星」李睿珍
同場舉行的「亞洲超級新星大賽」，香港代表陳明憙首位出場，在Joey Tang（鄧建明）帶領的大會樂隊伴奏下唱出Rock版《囚鳥》。受訪時她直言緊張，並透露克勤有叫她加油。問到是否由爸爸陳少琪幫手安排樂隊？她說：「唔係，今次好多專業人士幫我，佢對我嘅支持係確保我準備好。」最終大會頒發的「最佳舞台演繹大獎」、「最佳歌曲演繹大獎」及「現場人氣大獎」，分別由新加坡的沈志豪、韓國的李睿珍及馬來西亞的郭文翰奪得，並由李睿珍奪得「亞洲超級新星」得主。
文：音樂組
攝：張福宏