利穎怡天生灰諧行唔到靚女路線！

利穎怡（Joan）參加第26期無綫藝員訓練班入行，曾演出不少劇集，加入《東張西望》後，憑活潑生鬼表現令觀眾眼前一亮，加上經常晒長腿，成功吸引網民留意。問到為何加入娛樂圈？從加拿大回流香港的她直言自小受無綫劇集薰陶：「當時我係睇《陀槍師姐》、《妙手仁心》，睇完就好想做警察、醫生，但之後發覺自己係想做演員，因為可以體驗唔同職業。」她又稱最喜歡拍古裝劇：「所以最想係拍穿越古裝劇。」

主持愈做愈好玩

Joan坦言起初沒想過做主持：「好多人都覺得我適合做主持，可能我比較多嘢講。」但她愈來愈覺得做主持很好玩：「因為可以畀觀眾睇到我本身性格，令佢哋更加認識我。」雖然她自認聰明一族，但經常被朋友取笑是傻大姐：「其實我只係講嘢直接，口直心快。（邊個藝人笑你最多？）所有人都笑我，佢哋覺得我係一個諧星。（向呢個方面發展？）我本身好抗拒，我要行靚女路線嘛，但無奈係行唔到。」

利穎怡很慶幸有一個陪她渡過難關的男友。

利穎怡喜歡拍劇，可以體驗不同時代的生活。

男友不贊成入行

現實生活中，Joan有一個體貼男友，但入行前發生小風波，對方並不贊成她入行。她說：「佢話拋頭露面，其實返香港我打算做PR或者演員，PR我做過，所以諗住趁後生試吓做演員，就同佢講一係支持我，一係就分手！」幸而最終獲男友體諒，更一齊渡過不少難關：「一畢業就有個舞台劇要做，做完之後其他同學就不停好多工作，但自己就冇，要好頹成日喺屋企，諗點解得我冇嘢做，佢喺我最低潮時候仲咁支持我，我覺得好難得。」

攝：吳文聰

文：若瑟　

場地：嚐越