R&K堅持夢想走出逆境
組合Robynn & Kendy於網上翻唱歌曲而為人認識，獲唱片公司睇中簽約出道，之後再參加內地節目《中國好聲音》，發展順利，然而過去一年她們經歷事業迷惘期，才令兩人明白順境非必然，身處逆境時更需要堅持夢想。
Robynn & Kendy（R&K）相隔一年再出新歌，帶來全新風格的廣東歌《負攝石》，道出她們去年的心路歷程。她們說：「有時唔知點解你好搏命去正面，但永遠惹埋啲負能量，係一種掙扎中嘅感受。」過去一年，因公司人事變動等問題，令R&K遲遲未推出新歌，一度陷入迷惘期：「公司內部好多人事調動，令我哋覺得唔知點樣，好似孤兒仔咁，好多嘢都喺我哋嘅控制範圍之外。另一樣迷惘嘅係參加完《中國好聲音》、出咗國語碟之後，點樣返香港踏出第一步，話畀大家聽我哋冇離開香港樂壇。」
以為理所當然
Robynn坦言自出道以來發展尚算順利，令兩人不自覺地將一切視作理所當然：「純粹講我哋嘅事業嘅話，好多嘢好順，好似自己做啱咗嘢，YouTube好多人睇，我覺得知道自己做緊乜。但之後先發現呢啲嘢全部係上天賜畀我哋嘅，唔係因為咩，只係因為嗰一下嘅天時地利人和。」
冇諗分開發展
兩女選擇在這段時間增值，沉澱一年終於等到機會重新出發：「唔係你嗰時好順就好堅定，你係要喺你辛苦嘅時候都要堅定，辛苦嘅時間嚟到，你要點樣去處理呢？」經此一役後，兩女感情亦再次昇華，Kendy說：「好多嘢大家一齊啃咗，個感情層次高咗。」問到可有想過要分開發展？兩人指R&K是多年來辛苦建立的品牌，愈行愈清楚知道她們的價值及對歌迷的影響：「未來嘅嘢真係唔知，但依家我哋好希望將準備好咗嘅歌畀大家，同埋畀時間我哋再摸索吓多啲可能性先。」
攝：劉智源
文：音樂組
Hair：Eve Chiu@Queen's private i salon
Makeup：Leo Tam@Annie G. Chan
Venue：Metropolitian