朱千雪中晒「三高」點開Dry？
現時香港社會女多男少，正所謂僧多粥少，港女唔愁就有鬼！未去到3字頭，身邊冇人追就已被列入「剩女」嗰欄，其實好多剩女條件絕對唔係「翹口巉手」，好似朱千雪咁，擁有最強嘅「三高」：高學歷、高收入、高顏值！可惜成也三高，敗也三高。千雪BB曾經大呻，感情生活由成年之後一直Dry到依家，一個咁高質素嘅女仔竟然咁多年都「未開Dry」？聽到都心噏！
當年無綫搞花臣玩全民普選港姐，千雪BB民意一枝獨秀，諗住冠軍實食無黐牙，點知臨門一腳網上投票「冧Server」，喺冇數據支持下，后冠咁就跌咗！千雪BB做唔成民選港姐，但短短五年竟然反高潮變咗「離地港女」，高不可攀！大家認知嘅「港女」代表拜金、愛名牌、裝可愛、扮嬌嗲，好似早排嗰位出晒位嘅港女Seasun就目標為本，講明「有樓有高潮」。在供求社會下，相信能Offer得起嘅男人都好Buy呢種偉論，只要對症下藥滿足各自要求，男人反而覺得呢種港女夠直接簡單，容易到手。
擸雲梯都高攀唔起
偏偏千雪BB非我族類，冇「公主病」之餘仲患「三高」，高到用雲梯都去唔到佢嘅Level。佢簡單一句：「樓？唔使，我有啦！」呢股霸氣足以K.O晒一班有樓港男，莫講話冇樓港男唔敢埋身，有樓都未必敢啦？一啲「冇腦冇墨水」嘅男人，面對千雪BB唔自卑都難！
雖然千雪BB未及麥明詩攞十優兼劍橋畢業，但佢學無止境嘅求學心態就輕易贏晒，喺港大攞到碩士學位都仲未夠皮，又去埋城大讀法律。女仔太叻太強，唔多唔少都影響愛情運！
男人就係咁衰，有時就係鍾意啲女仔一副冇主見嘅樣，仲要高八度崇拜Mode咁問你：「真係o架？點解嘅？你好叻呀！」而將「港女Tone」演繹得最完美傳神的，首推梗係吳若希啦！呢啲就算千雪BB讀幾多書、日日返學都學唔到o架！
代溝闊過城門河
千雪BB想打爛「Dry砵」都幾頭痕，尤其要喺圈中搵到個襯得起佢嘅筍盤，數嚟數去，睇怕暫時只有IQ、EQ、AQ（逆境商數）、MQ（道德商數）乜Q都掂嘅子華神──黃子華，先可以降伏到佢！子華神之所以被人封為神，皆因佢知識廣博、轉數快唔在講，仲係香港棟篤笑鼻祖！你估吹水真係咁易？喺紅館講足幾粒鐘，都要用氣用神，一開口就要一氣呵成，掌握咩位令你愈聽愈高潮！論身家，子華神話你知，佢完全唔使靠父幹，單憑佢嘅金舌頭已經掃咗唔少磚頭！論學歷，子華神同千雪BB都同樣喺加拿大大學畢業，夠晒同聲同氣嘞啩！
樣樣都符合，好似好Perfect，但係拍拖唔係好似to-do list咁，全部剔晒就得！拍拖最好玩嘅地方，係有時你估我唔到！對住一個太聰明嘅女人，佢幾欣賞你都好，但係做乜都被佢估到，邊夠過癮？再講，子華神同千雪BB年紀相差成28年，年紀同思想個gap闊過城門河。講人生閱歷同經驗，子華神正宗食鹽多過你食米，求其講一句，千雪BB有冇咁多斤両接招先？講到呢度，千雪BB又唔好咁灰，愛情始終要嚟就嚟，等白馬王子嚟之前，增值自己讀多啲書之餘，都學吓點樣做一個女人，撒嬌女人最好命！
Nuts哥