黃浩然「八美」圍咀面紅速逃
藝人黃浩然、陳凱琳（Grace）及朱晨麗等前晚出席新劇煞科宴，當中艷福不淺的浩然被「八美」包圍獻吻，反而面紅速逃！而Grace冧爆透露與男友鄭嘉穎的相處點滴：「小事都顯出佢好關心我。」
黃浩然、陳凱琳、朱晨麗（朱朱）及蘇玉華等前晚於尖沙咀出席無綫劇集《平安谷之詭谷傳說》煞科宴，浩然在現場「畀女圍」，喜獲陳凱琳、蘇玉華、龔嘉欣、陳庭欣及樂瞳等8位美女圍住作狀獻吻拍照，惟艷福不淺的他拍照後面紅耳赤急急腳逃離「美女陣」，睇怕擔心被太太「扭耳仔」，場面搞笑！他透露煞科宴擺10圍，由主要演員夾錢埋單：「阿蘇、我、Grace、朱朱成日爭住請食嘢！」他表示對劇集有信心，又稱自己與Grace的夫妻戲浪漫甜蜜！
Grace唔敢引誘嘉穎
Grace亦大晒Sweet，提起日前於網上分享男友鄭嘉穎為她「剪倒刺」的相片，直言冧到爆：「嗰日食晏畀佢見到我有倒刺之後幫我剪，幾Sweet，小事都顯出佢好關心我。」問到與男友如何慶祝白色情人節？她透露男友忙舞台劇，故只通電話互相打氣，她笑言不敢為男友炮製美食：「想整Cake畀佢，但會害咗佢。我精神上支持佢，唔好引誘佢。」又表示考慮等男友完成舞台劇後齊齊去旅行。」
朱晨麗抱病有仔關心
另外，朱朱抱恙上陣，又稱早前拍劇時發燒，幸獲監製體諒：「嚟之前去咗睇醫生，前排一路開工一路病，有日發燒去醫院打針，監製好好，為我調咗場戲。」問到有否獲異性送上關心？她笑言獲男粉絲關心及送花：「Fans叫我保重身體。（異性？）男Fans，仲有劇組同導演，導演攞藥畀我。（適逢白色情人節？）我收咗花啦！Fans送嘅！」她直言感情事隨緣，希望在工作之餘，能找到另一半，但目前要專心工作，亦冇人追。
文：影視組