莊思敏呻Dry 玩交友App識男仔
單身多年的藝人莊思敏昨日與林芊妤（Coffee）行婚紗騷，兩人大晒「胸」器，睇頭十足。由於二人都行過多次婚紗騷，異口同聲表示將來婚禮未必會披嫁衣。莊思敏說：「結婚嗰時可能着自己設計嘅晚裝，總之以靚為主，不過今日顯得特別肥。（有愛情滋潤肥咗？）唔係啦！單身好耐好Dry，依家見到阿妹（莊思明）拍拖就忟，但感情嘅嘢要睇緣分。」
莊思敏又自爆下載了交友App：「八卦吓，見到啲男仔填資料，有同個男仔傾偈，問我係咪真係莊思敏，我八卦吓玩吓，但啲人都好細個。（介意？）想大十年以上。（約出嚟見？）唔會，delete咗個App啦。（有機會想試吓識男仔？）都想。」她更希望參與男女配對真人騷，找到真命天子。
Coffee未想嫁
而「谷胸」Coffee表示將來結婚希望一切從簡：「想簽字就算，簡單啲，香港擺酒太貴，反而想請家人去旅行，順便行禮，幫老公慳錢，留畀小朋友。」她與圈外男友Weng拍拖一年，大讚他IQ、EQ都高，十分滿意，問到有否結婚打算，她說：「我得27歲都仲細，唔好講到我逼婚。（生BB呢？）30幾歲都生得，可能聽日宣布婚訊同分手呢，過得一日得一日，好似好悲觀咁，我唔一定要結婚，就算結都可能係為生小朋友。」
文：名人組