艾威爭氣《我老婆》逆轉勝
藝人艾威首次孭飛初登電影男主角的新片明日（3月16日）上映，他坦言電影喜劇背後的傷感故事，正如其人生，即使做了電影男一，但問Boutique借衫仍遭白眼，因此新片必須做出成績，才可取得逆轉勝！
艾威、林熹瞳、張文慈（Pinky）及周俊偉日前聯同新片《我老婆未結婚》監製秦嘉駿為電影造勢，艾威提到雖然初當男一的電影遠赴荷里活拍外景，但風光背後仍遭白眼：「今次我嘅生死操縱喺觀眾手上，套戲成績非常重要！因為之前我喺灣仔一間Boutique買開衫，同個老闆傾借衫做訪問，佢話好，仲送條皮手帶畀我。點知畀我親耳聽到佢話我『恃熟賣熟』，我好難受，即刻揸車出灣仔退番條手帶！呢件事令我明白到藝人名氣好重要，自問我哋套戲係誠意製作，如果因為唔滿意我綠葉王形象而令觀眾錯過咗，係非常可惜！」
片中飾演艾威老婆的Pinky力撐：「聽到艾威話佢做咗40年配角，我有啲Sad！我支持佢o架，邊個冇做過配角？艾威戲中好男人舉動令我感動，有男人咁樣為我，我一定好珍惜，可惜現實中冇！」
實力派撞出新驚喜
而身兼監製、編劇及主演的林熹瞳說：「套戲係溫馨小品，講我懷疑周俊偉劈腿，鬥氣之下做咗艾威嘅出租情人，係笑中有淚嘅輕喜劇。雖然同男神周俊偉合作，但遺憾冇親密戲，寄望下次！」周俊偉則說：「你應該寫埋我去L.A.嘅戲，等我進軍荷里活！」監製秦嘉駿則說：「搵艾威係想畀觀眾新嘅元素同驚喜，佢有實力、有經驗、有誠意，亦都擺好多心機、力量去做好男一，一定會帶畀觀眾新鮮感！」
服裝：Penny Black（林熹瞳）、agnesb（周俊偉）
攝：吳文聰
文：影視組