張衞健熱辣辣開工呻命苦
影視界粒粒紅星昨日齊集影視展，其中張衞健透露入夏後要返內地拍無綫劇，笑言苦命一條，「硬食」也！馬國明則與舊愛胡定欣不時傾偈，反與緋聞女友黃心穎「有距離」。
藝人張衞健、麥明詩、馬國明、黃心穎、蕭正楠與黃翠如等昨日齊齊出席《TVB50周年獻禮》，其中以麥明詩露腰最性感，師妹馮盈盈則微露事業線搶鏡。席上，馬國明與舊愛胡定欣有講有笑，反而與緋聞女友黃心穎相隔幾個身位！而歐陽震華宣傳劇集《誇世代》時，幫曾下體現形的吳業坤改花名做「Big鵰」，森美則笑言花名叫「撐爆」。
宣萱想合作？早講嘛
張衞健透露夏天時會為劇集《大帥哥》到福建拍外景，笑言自己是苦命一條，印象中拍過成績好的戲都在酷熱天氣下拍攝：「未試過舒服，係命嚟！（舊愛宣萱話想同你合作！）早啲講嘛！我喺TVB冇Say，但唔抗拒囉！其實每一位都再見亦是朋友，雖然唔係好多個！（仲有舊愛江欣燕，會搵佢客串？）要睇劇本囉！都有諗過，真係冇所謂。」他坦言與舊愛都有互相問候：「做唔成夫妻、情侶，互相關心都應該！」今次重返TVB拍劇，問到是否要拍檔洪永城帶路去廁所？健仔說：「真係！好多唔明嘅都問佢哋，唔通去問珍姐（曾勵珍）咩！」
《深宮計》宣傳上，馬國明與舊愛胡定欣傾得甚投契，反而與「新歡」心穎「有距離」。事後他解釋是大會安排，心穎則坦言不會呷醋。兩人又坦言不介意情侶檔合作，高層樂易玲亦已批准，馬國明笑說：「佢實畀0架！公司有抽佣0架嘛！」至於黃翠如與蕭正楠不介意被心穎、馬國明這對情侶檔「爭飯碗」。
文：影視組