樂易玲撐上市 黃宗澤獲捧做影視大亨

藝人黃宗澤、劉心悠、關菊英及吳岱融，昨日到「香港國際影視展 （Filmart）2017」出席簽約加盟邵氏兄弟儀式。繼王祖藍後，黃宗澤在邵氏兄弟成立自己的工作室，邵氏高層樂易玲更揚言要為Bosco的公司上市！

飛虎救「媽」夠爆笑

簽約儀式完成後，現場突然出現「恐怖分子」，並「挾持」樂易玲，冼國林即場大叫唔好，惹來全場爆笑。而邵氏與優酷投資逾億拍攝的網劇《飛虎極戰》成員黃宗澤、吳卓羲、王敏德、梁烈唯等就極速趕到迎救，並制服犯人。樂易玲即向黃宗澤撒嬌：「乜你咁遲先嚟o架！」Bosco笑說：「阿媽，我係隊長嚟，負責指揮大局。」

提到樂易玲揚言為Bosco的公司上市，他笑說：「上市好大壓力，過多幾年先，樂小姐就講得輕鬆，要睇時間配合，依家手頭上有10個project，我就同佢講笑話命就得一條，人就得一個，不過啲project都好吸引，完成手頭上嘅工作，都有興趣參加製作。依家自由度大啲，可以揀去做，多啲空間。（簽藝人？）想o架。（合作酬勞好好？）錢冇人會嫌，多勞多得，我就唔同劉心悠，我睇錢嘅，我又要養阿媽，阿媽又大使，成日去旅行，哈哈。（攞錢出嚟投資？）要睇project。」

現場突然出現「恐怖分子」，把樂易玲「挾持」綁架。	放大圖片	劉心悠直言被樂小姐的誠意打動。

劉心悠齋講誠意

劉心悠則表示加盟邵氏是講個信字，望多拍電影及網劇：「樂小姐好有誠意，真係講個信字，冇乜特別條件。（酬勞吸引？）當然雙方都好滿意，但係錢唔係重點。」吳卓羲表示與Bosco已有十多年冇合作拍劇，網劇將在五月中開拍，要為角色操肌。問到會否有騷肌露點戲，他笑說：「我諗都有，沖涼戲在所難免。（同黃宗澤一齊沖？）擦背吓嘛，哈哈。（再露股？）露股會畀人投訴，不過依家有跑步提升靚股。（學黃宗澤公司計劃上市？）上市就慢慢嚟，要請教Bosco。」

關菊英及吳岱融簽約加盟邵氏兄弟。

邵氏與優酷投資逾億搵來多位猛男拍攝網劇《飛虎極戰》。

文：影視組