任賢齊賊性難改狠睥個仔
內地女星張雨綺與台星任賢齊前晚出席「香港專業電影攝影師學會」周年晚宴，席上雨綺和小齊分別獲頒「最具魅力男、女演員」獎項，對演戲極之投入的小齊，自爆演悍匪太入戲竟在餐廳構思打劫逃走路線，又「狠睥」自家小朋友，抽離不到角色。
張雨綺、任賢齊、導演劉偉強及資深攝影師黃岳泰等，前晚出席尖沙咀舉行的「香港專業電影攝影師學會」周年晚宴。獲「最具魅力男演員」獎的小齊，坦言未試過在台灣出席類似場合，指香港電影業界好有向心力兼有氣氛：「台灣嗰邊冇人邀請我，大家都知我住香港！」
小齊冇信心攞影帝
小齊揚言會繼續努力做好每個角色，有時卻努力過頭抽離不到，他自爆早前飾演悍匪太入戲，搞到收工回家仍惡形惡相狠睥小朋友，甚至到餐廳食飯時亦諗定打劫逃走路線：「所以拍之前同自己講拍完要抽離，調整咗幾日。（今屆被提名金像獎影帝？）因對手太強冇信心得獎，但可以坐埋一齊已經係一種肯定。」
冇獎不好意思回家
笑指冇獎就不好意思回家的張雨綺，今屆金像獎獲提名「最佳女配角」，她坦言對入圍感意外：「沒想過劇組幫我報金像獎，很高興，上一次已是提名新人獎。（老公知道你獲提名後有否慶祝？）拿獎後慶祝，沒拿也不好意思回家！」問到雨綺所演的影片導演周星馳會否一起出席頒獎禮？她指暫時未知安排，只希望當晚天氣暖點和不要下雨，因為之前試過出席金像獎變落湯雞。
文：影視組