獲洪金寶封「功夫巨星」 古天樂「斬件」上「武」料挑機子丹？

藝人古天樂、林家棟、蔡潔、盧惠光及泰國武打影星Tony Jaa，於灣仔影視展宣傳電影《貪狼》，鮮有拍動作鏡頭的古天樂於戲中有大量武打場面，不知是被開玩笑還是堅打得好，竟獲動作導演洪金寶封為近十年來難得一見的功夫巨星！而記者會上，好打得的Tony Jaa示範泰拳比賽前的動作，又即場Beat Box Rap歌，展現多才多藝一面。

拍完要坐低回氣

古天樂對於應付如此大量而且高難度的打戲，最好可一不可再：「戲入面有場長達十幾分鐘嘅打戲，洪金寶搵武師打咗，剪埋配埋樂畀我睇，我睇完眼都跌埋出嚟，我真係做到咩？到我拍嘅時候，我係拍完，但要喺原位坐番張櫈休息，休息完再拍。（唔用替身？）有啲翻騰動作我真係做唔到，其餘我逐啲學、逐啲拍。」打得如此搏命，問是否想挑戰「宇宙最強」甄子丹？他搞笑地說：「唔係，佢係一個打十個，我係一個打十幾個，不過係分開打，最多打四個。」

洪金寶	蔡潔露肩晒線，性感上陣。	林家棟講起背泰文對白，猛話辛苦！

林家棟講泰文辛苦

另外，林家棟於戲中演反派而且要講大量泰文，他為了熟讀對白而不敢外出：「戲入面我只得一句廣東話對白，其餘全部係講泰文，好多時仲係今日先收到聽日劇本，於是就自己記番啲泰文拼音，我唔敢出街，日日匿喺酒店練，因為有啲泰文對白啲音好似廣東話粗口，啲香港嘅工作人員喺度笑，我都忍得好辛苦呀！」

而穿泰山裝露出半邊香肩的蔡潔，被問到與王宗堯甩拖，她不欲多講：「都過咗一段時間，唔想多講喇！（佢話你冇覆短訊，咁佢就『被分手』，會唔會太絕情？）我覺得感情事，兩個人知道就夠喇！好難同其他人講。」

文：影視組