黃美棋觸電男友遭揸胸
藝人黃美棋早前孖男友鍾健威到意大利參加友人婚禮，自爆與對方到埗後各有艷遇，自己被靚仔侍應「電親」外，男友更慘遭「鹹豬手」：「佢畀人揸咗吓個胸！」
藝人黃美棋日前宣布將到韓國受訓再戰影藝事業，與前有線主播男友鍾健威（Ray）的結婚大事因而要延遲進行，但亦冇損兩小口感情，更齊齊遠赴意大利出席好友婚禮，順道取經。美棋於婚禮上，為新娘擔任姊妹，笑言對糅合中、意文化的婚禮大開眼界，更大爆與男友「各有艷遇」！
被侍應電暈
美棋笑言被意大利猛男侍應施展「電眼」攻勢，惹來男友Ray妒忌：「去完教堂行禮後，大家就喺花園開party，我畀新郎哥叫咗去同佢啲意大利朋友影相，晚飯時間就一齊搭膊跳火車舞。Ray當時係咁望住個靚仔侍應，又偷影人哋，我同佢講：『呢個男仔頭先喺草地食嘢時電過我！』佢聽完就好妒忌咁話點解對方唔電佢！」美棋又笑指意大利人相當熱情，男友Ray更被同性「胸襲」：「我見佢被人抽水，揸咗吓個胸！」
擔心「撞鬼」
出席好友婚禮期間，美棋入住有千年歷史的城堡，曾一度擔心「撞鬼」：「一對新人決定喺城堡行禮，所以我哋就住咗成個星期城堡，未出發前已經好驚，始終有成千年歷史，不過去到成個感覺又唔同，好舒服同熱鬧。」
文：影視組