影足九個月「把緣留住」 鄭文雅兩分鐘搞掂校長
前港姐鄭文雅（Olivia）舉行個人攝影作品展，直言最大挑戰是影「樂壇校長」譚詠麟，皆因對方只畀兩分鐘時間拍攝，但Olivia單憑一張相就影出三個不同形象的校長，認真厲害！
前港姐鄭文雅（Olivia）將於四月推出第三本攝影相集，昨日更舉行個人攝影作品展，在180多張相中展出其中45張，以香港情懷「把緣留住」為題，獲老公虞哲揮、姑奶虞茱迪（Judy）及前港姐翁嘉穗到場支持。
唔夠發哥手長玩自拍
Olivia表示這本相集是最花時間的一本，用了九個月時間以旅客角度到香港不同地方拍攝。當中數到最大挑戰，Olivia坦言是影譚詠麟：「佢好難約，去佢錄音室畀我兩分鐘影，鋼琴倒影影到三個佢，作為演員有三個自己，做角色嘅佢、觀眾睇嘅佢同真正嘅佢，我好滿意張相，係最大挑戰。」問到為何不影周潤發？她笑言：「未得閒見到發哥，我原本想影佢家姐（周聰玲），但約嚟約去都約唔到。（你鍾意自拍？）好少，唔夠發哥隻手長。」
翁嘉穗則表示以前與Olivia是住樓上樓下的鄰居，今次Olivia拍攝她在床褥舖頭工作的情況，她更直言會考慮找Olivia影全家福。12歲開始學畫畫的翁嘉穗，曾畫過老公的自畫像，問到會否想開畫展，她表示：「有諗，要儲多啲畫先，依家有20幾幅油畫同水彩畫，我學緊中國水墨畫。」此外，有份被攝入鏡頭的Judy，透露與Olivia相識20幾年，當年更是她做媒人撮合Olivia與弟弟拍拖，所以緣分好深。
文：名人組