鄭敬基童顏搶Fo 父子變「兄弟」

鄭敬基（Joe）去年迎娶比他年輕19歲的圈外女友Angie，但Joe天生童顏，二人外形上差距不遠。近日兩公婆飛到澳洲悉尼，於當地時間10號出席27歲囝囝鄭家揚於悉尼大學（University of Sydney）的碩士畢業禮，Joe在社交網分享喜樂，並引起網民熱議。Joe留言：「轉眼27載，此時此刻確是喜悅得難以形容。未來是兒子你的路，我會每天禱告。恭喜你今天碩士畢業。」網民留言指他兩父子似足兩兄弟，連藝人錢小豪也留言：「哥哥慶祝弟弟畢業！開心！」繼母Angie穿上晚裝出席家揚的畢業禮！

兒子被誤當「鄭敬基」

事後Joe接受電話訪問，講到兩父子十足餅印，他笑說：「冇咁諗，但好多人咁講。」又透露囝囝是實習物理治療師，試過有病人跟囝囝說：「你好熟面口，係咪唱歌o架？係咪鄭敬基？」囝囝即澄清：「我係佢個仔。」被讚與囝囝似兩兄弟，有何保養心得？他指自己純天然，沒有吃過補品，還分享童顏秘訣：「自己冇愁，唔開心會同身邊人分享，唔會眉頭皺。」又謂今趟旅程最開心是兒子的貼心舉動：「我膊頭痛，阿仔幫我醫，又得喎！好感恩，佢以前仲係人仔，依家識醫我。」

組兄弟合唱團？

問到前妻和細女為何沒有現身？他解釋：「媽咪（前妻）同妹妹喺加拿大，囝囝得兩張畢業禮嘅飛，所以我同老婆做代表。」又透露將會很忙，要不時飛到加拿大：「囡囡6月大學畢業，我要過去，佢讀教育系，8月到囝囝結婚，新抱係音樂治療師。（你同個仔咁似樣，組兄弟合唱團？）絕對冇可能，佢哋冇興趣入行，留邊度發展就佢哋自己決定。（恨抱孫？）冇所謂，順其自然，到時可能話個孫係我個仔。」

文：專案組、音樂組