張繼聰浪漫教主
經歷過高山低谷的藝人張繼聰，近年愈來愈有男人魅，對人生管理自有一套看法，不敢自誇「浪漫男」的阿聰認為浪漫是在生活點滴中，在適當時候畀驚喜，但他笑言總是將自己縮到最細，旅行都為家人做阿四及司機，這種無私付出，看來才是令太太謝安琪最窩心的浪漫。
付出不求回報 最緊要啱Timing
阿聰形象風趣搞笑，想必是個浪漫之人，不過他自爆與Kay都不太重視節日及紀念日，笑言浪漫是對「啱的人」做「啱的事」，而且要時機適當才夠驚喜：「每個人都有自己嘅浪漫方法，最緊要有心，唔一定講錢，我有個朋友同女友成餐飯唔傾偈，齋寫紙仔，我覺得呢招浪漫喎！結婚耐咗係要驚喜，但又唔可以日日搞花臣，都會攰同膩，適當時候出擊啦！（你啲招數掂唔掂？）你要問番佢喎！我付出咗不求回報㗎！其實如果嗰個人唔係好鍾意你嘅話，你做咩都冇用，直頭畀人話『再騷擾我要報警』喎！與其諗一、兩件好浪漫嘅事，不如平日生活相處得好啲，有時去大牌檔，食餐普通飯、行吓公園都可以好浪漫。」
十萬放閃套餐 公告愛的宣言
不少人為冧另一半想盡辦法，阿聰就推介雲頂夢號推出的十萬元「星夢放閃套餐」，除了有三日兩夜豪華之旅，更可在郵輪船身的LED燈光系統播放私人「愛的宣言」，屬全球獨家。阿聰早前示範以「BE IN LOVE」及「I AM OK」等字句向Kay示愛，他說：「呢招威力好強勁，成隻船咁大喎！叫埋女友全家，甚至全香港人一齊睇，好創新，我係女仔都感動啦！」
張繼聰近年事業家庭兩得意，電影及拍劇機會不斷，被視為新一代好戲之人，螢幕下則與結婚十年的歌手太太謝安琪（Kay）恩愛如昔，佗B女的Kay將於本月分娩，湊成一個「好」字，令人羨慕！難怪外間視阿聰為「人生勝利組」，而他當日登上星夢郵輪雲頂夢號受訪，言談間表現克己專業及錫爆老婆的個性，正如他所說：「你可以成為某一種人，一定有啲原因。」
旅行的意義 家人開心就夠
熱愛旅遊的阿聰直言每年都會與家人到外地享天倫，但因近期Kay「有B大過天」，相信有一段時間都不會遠遊，笑言今趟上郵輪，在豪華甲板、泳池旁邊及套房遊了一圈已過足癮，阿聰說：「旅行好緊要㗎！希望一年一次，但要夾囝囝唔使返學嘅時間。（最深刻邊次？）次次都難忘，通常係好多家庭成員一齊去，地點唔係最重要，反而係人同心態，要享受過程，難忘咪係每次都係我計劃囉！要滿足晒所有人要求，好難㗎！老人家同小朋友鍾意嘅嘢唔同，次次都令大家感覺賓至如歸，我好大滿足感！」
阿聰笑言自從有了家室，早已將自己放到最後，即使做司機、阿四或導遊都夠開心：「我負責睇地圖、揸車，開心嘅，細個係父母帶我，依家就我帶佢哋周圍玩。（都係幫家人排行程，咁咪冇咗自己囉？）結咗婚有咗小朋友都唔使有自己㗎喇！佢哋開心我咪開心囉！旅行意義就係咁，廿幾歲就自己玩，依家我就做導遊，係另一種樂趣。」阿聰表示小時候曾上郵輪玩，但多數暈船浪，但如今的郵輪非常穩定，例如這艘高18層的雲頂夢號就可接載3,400名旅客，怕搭長途機的他直言坐郵輪旅遊絕對夠潮又好玩。
自律到嚇親人 習慣清淡唔怕悶
想起張繼聰，必然會想起他Fit到漏油的健碩身材，受訪當日他雖然沒有騷肌，但當發現船上有籃球場，即技癢騷球技。他笑言運動等於生命，即使工作再攰也會抽時間做運動：「演員都幾似運動員要保持狀態，有時跟角色大舊啲，有時要瘦啲，我知有人視我為目標去健身，但冇壓力，運動係自己嘅，每日都盡量抽個幾鐘做運動，體能上係攰，但都係放鬆嘅一種。」跟阿聰合作過的藝人都踢爆他平日食飯要隔油，笑言被他的自律嚇親，不過阿聰卻自得其樂，直言慣了清淡：「好多人以為我唔食嘢添！係少啲零食、油膩嘢啫。（少咗樂趣？）我好享受，每人口味唔同，你可以成為一種人一定有啲原因，我就係唔怕悶，有白飯已經享受，唔一定要濃味。」
後記
性格大方的張繼聰從不避忌提及家人，除了跟記者分享對時下教育制度的看法，講到家中將有女成員加入，更一臉甜絲絲，直言超級期待：「我屋企不嬲多男人，得我同細佬兩兄弟，依家有個女梗係正啦！（屋企多咗BB女用品？）之前真係未試過，暫時就未添置啲粉紅色嘢，可能將來會有喎！好期待！阿爸梗係想要個女㗎啦！」
文：立影
攝：劉斌