蔡思貝「真空」踩單車 寸陳嘉寶細膽
藝人蔡思貝（Sisley）和陳嘉寶（Anjaylia）齊參加踩單車活動，對於同場的任賢齊提倡「禁底論」，Sisley默認會「真空」上陣，對聲稱因未能衝破心理關口而堅持「打底」的Anjaylia存疑：「冇理由佢咁細膽！」
昨晨歌手任賢齊（小齊）、藝人陳嘉寶、蔡思貝、張彥博、陳國峰及組合Bingo齊出席單車百萬行活動。之前小齊在活動記者會上提倡「禁底論」，指踩單車不宜着底褲免磨損皮膚，問「處女」出賽的Anjaylia可有「除底」上陣？她以稍後要趕拍劇不會落場為由不肯「真空」，又笑稱曾想試一次，可惜：「如果今日參加到，都未必衝破到（心理關口），我冇咁勇敢。」自認是運動白癡的她稱手腳不協調，為怕男友教她教到鬧交，寧可找朋友教踩單車。
再見亦是朋友
而連續參加了兩年踩單車活動的Sisley，對於小齊的不穿內褲建議，她乖巧稱會效法：「咁我陣間去換衫先，前輩提議要聽。（Anjaylia唔敢喎？）佢冇理由咁細膽嘅！」另外，有傳Sisley想跟舊愛麥秋成箍煲，早前兩人前後腳到中環欣賞音樂會，可是前男友有新女伴同行，Sisley強調和麥秋成是好朋友，當日亦有見到對方：「我係同張曦雯去嘅，去到先見到仲有陳瀅嗰啲。（有同麥秋成聯絡？）有，朋友嚟吖嘛！（佢帶女伴喎？）我見唔到呀！（嬲唔嬲？）冇事呀，咁唔係男就係女㗎啦！」
無懼腰患落場
至於小齊無懼可能傷及世界越野賽中炒車的腰患照踩單車，他說：「如果係上下跳，腰骨要承受身體重量會比較痛，單車、滑雪呢啲係平衡嘅就OK，唔好跌低就得。」小齊又話聽專業人士提議，昨日真的沒有穿底褲踩單車，並再三說：「驚磨損！」
文：音樂組
攝：劉斌