黃心穎錫住前輩 撈家「Diana上身」
藝人羅嘉良（撈家）「回歸」無綫拍劇，與年輕一輩的演員打成一片，昨午出席宣傳活動時，就拿拍檔黃心穎緋聞開玩笑，更忽然「Diana上身」，成功炒熱現場氣氛，果然薑愈老愈辣！
撈家相隔8年以無綫劇集《與諜同謀》回歸本港視圈，令人期待。昨午他偕同李佳芯、黃心穎及鄭俊弘等，於銅鑼灣宣傳。玩遊戲輸了的撈家及李佳芯原本要被畫「大花臉」，後者慘變「血盤大口」，但負責畫撈家的心穎卻相當輕手，只為撈家搽唇膏，撈家即時「Diana上身」，令人忍俊不禁。與後輩打成一片的撈家，更當眾拿心穎與馬國明的緋聞開玩笑。
相隔8年重返無綫
事後受訪撈家揚言冇收視壓力：「盡咗力就算，套劇有追看性嘅。同佢哋（新一輩演員）合作愉快，有講有笑。雖然feel到剛開始時佢哋有啲壓力，但我都喺佢哋身上學到要有活力同能量。（覺得啲新進小花同你合作開嘅有咩分別？）各有各好，佢哋新鮮啲，個個畀心機睇劇本。」
談到無綫有意開拍《新創世紀》，撈家直言無綫方面曾接觸他：「時間唔係好啱，能夠拍《創世紀》都非常幸運嘞。今日鄭俊弘最多粉絲，好彩我都搶到主題曲嚟唱，我仲以為今日要唱添，我都要考慮吓唱番歌嘞。」
知晒馬國明行蹤
至於心穎被追問為何「錫住」撈家？她笑答：「佢陣間仲要做訪問嘛。」她又表示活動後，要趕去為《深宮計》開工，當記者用「佢」取替直呼馬國明時，心穎即「對號入座」謂：「今晚見佢唔到，因為佢通告去到今朝。（咁清楚人哋行蹤？）幕後工作人員講嘅，我有份拍套戲嘛。（嚟緊白色情人節送咩畀『佢』？）冇喎，情人節我都冇收到嘢。（收到就送？）諗吓囉，一係請佢上公司canteen食飯囉。（你又知我哋問邊個？）你哋仲會問邊個吖！」
文：影視組