黃美棋賣「水晶包」攻韓特訓
藝人黃美棋昨日身穿低胸裙配高踭鞋出席活動，大晒「水晶包胸」相當性感！事先張揚有「人生大事」要宣布的她否認是結婚，而是將到韓國受訓，深造唱歌及跳舞，她笑言或因此延遲結婚大計。
黃美棋、黃芷晴及憑劇集《親親我好媽》人氣上升的無綫男新人郭子豪昨日到鑽石山出席高跟鞋競跑大賽，美棋穿低胸裝大晒「水晶包胸」，畫面震撼！她笑言為襯桃紅色高踭鞋而穿這身性感裙，自己也不敢向下望。
唔貪玩無懼排擠
前晚美棋在網上預告有「人生大事」宣布，她昨日否認是結婚：「年底會離開香港去韓國訓練，我識咗個韓國製作人，佢叫我去體驗吓，我會學唱歌跳舞，對練發音、肢體語言都好有用。（去幾耐？）幾個月至一年話唔定，研究緊上咩課程，中間可能返港接吓工作。（去嗰邊簽埋公司？）未知，要睇係咪適應。（男友鍾健威有冇唔捨得你？）佢好支持我，知我鍾意演戲，香港去韓國好快啫！（要延遲結婚大計？）可能，希望唔好太遲，結婚前都想有好發展。」
其後美棋接受電話訪問，對於韓國導師出名嚴格，之前有香港藝人受訓被排擠，問她會否擔心？她說：「未知，但我唔係成日掛住玩嘅人，導師愈嚴愈好，即係代表專業，亦唔驚同當地人相處唔到，今次我上嘅課程都唔係一班人，會學好自己先。」至於有關韓國潛規則的新聞時有傳出，問會否怕被安排「陪食飯」？她說：「我經理人都識嗰位製作人，我好放心，唔會有呢啲事發生，況且有時啲嘢係自己選擇。」
郭子豪斗零踭險跌
郭子豪首次穿斗零踭行路，行到歪斜多次險跣低，要兩位女士出手攙扶：「由趾頭痛到腳踭，真係覺得女人好偉大！（扭親？）冇，係小腿痠痛。」另外，黃芷晴透露日前帶男友與家人到泰國旅遊，父親黃日華對男友印象超好：「佢兩個去買Tee好開心，Friend咗！（過咗爹哋呢關，結得婚？）Plan緊。（幾時？）未求婚。」
文：影視組