馬德鐘型「仔」登場 幫老竇攞彩
圈中索爆星二代近年備受注目，繼邱淑貞長女沈月、任達華愛女任晴佳、李連杰細女Jada後，馬德鐘的18歲兒子馬在驤亦愈來愈有型，昨日他隨父親馬德鐘初入馬場，高大有型！雖然「馬主」馬德鐘昨日未能拉頭馬，兒子已為他攞晒彩！而近年返內地拍劇賺人仔的馬德鐘，染指飲食業，與老婆投資近千萬連開兩食肆再做老闆，父子同樣有市場！
昨日馬場星光熠熠，「宇宙最強」甄子丹與太太汪詩詩、汪圓圓及老公蔡加讚、許晉亨和洪金寶等現身馬場，馬德鐘與陳玉蓮及幾名好友合資購買的團體馬「快樂實在」昨日首日出賽，身為馬主的馬德鐘帶同太太張筱蘭、兒子馬在驤入場撐愛駒，就讀國際學校又是游泳健將的馬在驤，在國際比賽中拿過不少獎項，昨日見他又長高不少，身高達1米88，穿起西裝、戴上眼鏡十分型仔，媽咪翹着他同行時，儼如姊弟一般，現場更有馬迷看見兩父子亦紛紛舉機拍攝，不過馬在驤怕醜未有受訪。雖然愛駒最終未能勝出，僅跑第五，但馬德鐘兒子的出現已為他攞晒彩！
馬德鐘表示愛駒首次出賽當然要來捧場：「第一次出賽，囝囝又第一次嚟馬場，等佢見識吓。（想拉頭馬？）望係咁望，精神上要支持。」問到兒子身高已跑贏他時，馬德鐘笑說：「年輕人、下一代係高啲。（畀佢入行？）讀完書先。」馬太亦表示已落注支持，至於是次做馬主的投資金額，馬德鐘則未有透露：「好細份，參與吓，一齊開心就好。」
開蠔吧睇舖裝修
其實馬德鐘向來有生意頭腦，除投資買馬及與家人經營傢俬店外，去年他又與兄姐合資七位數開日本餐廳，以紀念亡父，可能搞食肆搞上癮，近月他與太太投資近千萬，在黃埔開蠔吧及紅酒店，早前記者發現他與太太親自落舖睇裝修，當時店舖現場沙塵滾滾，難得夫妻倆全不介意，與同行幾名裝修工人有傾有講，而馬德鐘不時走來走去、指指點點，有來電時他更一人用兩個電話，邊傾邊睇裝修，甚為忙碌！昨日致電給他時，他說：「做食肆真係初哥，邊學邊做。上年開咗『松』日本料理後，就好有興趣發展飲食業，除咗自己鍾意美食，仲好鍾意有創意嘅健康飲食，所以今次會開一間西餐廳，有唔同煮法嘅蠔，旁邊就會開一間賣酒嘅店。」其座右銘是凡事皆親力親為、用心去做，因力不到不為財。至於投資是否近千萬？馬德鐘說：「唔好講幾多錢啦！手作仔試吓，做生意必須有實際經驗，全情投入，唔應該紙上談兵。」他還分享做老闆心得，要掌握裏裏外外的情況，由廚房、樓面、公司管理、市場策劃至採購都要知，絕對不可「微管理」：「用人不疑，疑人不用。」
陳偉琪有護花男
此外，無綫新一代咪神陳偉琪昨日亦性感現身馬場，身旁有一位護花男，但她卻否認是拍拖：「唔好誤會，佢係Family Friend嚟㗎，我Uncle有馬出，所以趁熱鬧一齊嚟。（你哋拍拖？）唔係啊，唔好誤會。（有冇買馬？）買咗一場，輸咗一百蚊！」
文：名人組