金像影后妮歌潔曼日前在美國洛杉磯宣傳HBO新劇《Big Little Lies》，獲本報獨家報道。她自爆拍戲搞到周身傷，嚇親老公Keith Urban，並首度承認曾與舊愛Lenny Kravitz訂婚，但今次與對方的女兒Zoe合作完全冇尷尬！
劇集《Big Little Lies》改編自Liane Moriarty同名小說，講述三名看似過着美好生活的母親，因一次在籌款聚會發生的謀殺案令生活出現轉變，面對社區流言四起及鄰居之間互相出賣，三人背後隱藏的秘密隨時曝光！
飾演靚太Celeste Wright的妮歌潔曼（Nicole Kidman），劇中與舊愛Lenny Kravitz的女兒、飾演Bonnie的Zoe合作，提到現實中差點成為Zoe的繼母，她表示毫不尷尬：「Well，我一早就識Zoe，因為我同佢老竇訂過婚，今次合作就好似一個大家庭！」首度自爆曾與Lenny訂婚！雖然事隔多年，但妮歌仍大讚舊愛：「我愛Lenny，佢係一個好男人。」完全不擔心現任老公Keith呷醋！
妮歌同時稱讚老公Keith對她關懷備至，透露拍攝搞到周身傷，令老公非常擔心：「劇中有好多需要體力勞動嘅場面，我仍然好想親身嘗試，希望可以令整個演出更加真實，所以搞到周身傷。老公見到我沖完涼成身都係傷痕，就問我『你喺片場究竟發生過咩事？』」
提到較她年輕9歲的型男阿歷山大沙格（Alexander Skaarsgard）在劇中飾演其丈夫Perry，妮歌憶述彼此如何建立默契，從而令演出更有火花：「最初我同阿歷山大會討論角色同彼此嘅關係，之後收工都會去食飯傾偈，咁樣唔代表我哋將工作拋諸腦後，反而係建立咗友誼，令彼此更深入了解。依家我哋真係成為咗好朋友，會同對方講任何事，能夠從工作中獲得呢份額外嘅得着，真係好好！」
文：外娛組