吳雨霏魚網絲襪拉上肚復工開心就做
歌手吳雨霏去年不幸流產，走出陰霾，前晚復工以黑絲包肚的前衞Look出席活動，貴為人妻的她豪氣表示現時工作以開心行先，更自爆追看偶像林憶蓮參加的內地歌唱比賽節目，大讚對方有勇氣及敢於挑戰自己。
休息一年的吳雨霏（Kary）前晚出席化妝品牌開幕活動，穿上露臍裝襯魚網絲襪的她將絲襪頭拉上肚，相當前衞及搶Fo！她笑指因太耐沒見大家才悉心打扮，並宣布復工：「今年真係衝，會多啲見大家。」Kary去年不停旅行歎世界，難怪她直言時間過得很快：「唔經唔覺有兩年冇出歌，最近開會有少少無形壓力，上次隻碟搵咗林憶蓮幫我做，自己要求高想有好成績。」
邊睇邊戥偶像緊張
對於偶像憶蓮參加內地唱歌節目《歌手》，Kary興奮地說：「成日睇住佢，喺電視旁邊緊張，希望佢贏啦！（擔唔擔心佢輸咗會影響聲譽？）唔覺得會，佢呢幾次試咗好多唔同曲風，大家好欣賞佢呢樣嘢，同埋我諗佢唔係想贏或計較輸贏，係想攞經驗。」她坦言沒膽量參加節目：「依家好輕鬆，開心就做，唔開心就唔做，佢仲需要勇氣，佢已經去到嗰個位，仲要去挑戰自己，真係好勁！」
新歌玩型格騷舞功
此外，Kary透露新歌走型格路線：「因為已經有好多慢歌，想Build Up自己Image，想有啲有型啲嘅嘢。（會跳舞？）應該會，所以嚟緊都要排舞。」相隔兩年再入錄音室的她表示緊張及期待，問到會否參與MV拍攝？她說：「我對拍嘢、衫都好高要求，會睇有冇機會自己拍埋。」
文：音樂組