瑪姬着和服引老外埋身
藝人瑪姬日前抽空帶阿媽去旅行，遊足五日大阪及京都，期間穿上和服遊寺廟，她笑言變成旅遊景點惹旅人拍照，更有異國「艷遇」：「之前同朋友去京都着過和服，覺得好玩同好靚，好多女仔一着和服就覺得自己變成靚女，我着咗都覺得自己係個靚女，不停請媽咪同我以唔同角度影好多相。點知影影吓有來自俄羅斯、台灣同澳門嘅遊客分別走嚟同我影相，當中有位俄羅斯男仔仲用長鏡當我係Model咁幫我影，影完問我攞電郵話畀番張相我。現場其實唔止我一個着和服，可能因為我以為自己好靚，人哋見呢個女仔好影得吓就行過嚟，哈哈。」
