張致恒火辣新歡登場極度誘惑

出道14年的張致恒先後與多位女歌手及o靚模拍拖，給人感覺花弗，至2014年底被本報獨家撞破與35E導彈胸模特兒莊端兒公園談心，Steven當時大方承認發展姊弟戀，不過去年再被本報拍到背女友「偷嗒」富貴台妹，知衰的Steven即宣布與Xenia結束兩年情，並向Xenia公開道歉兼承認有性上癮須求醫。

大膽照流出

揚言寄情工作的Steven不出半年又有新女上場，前晚在公開網誌的「大頭相」中「放閃」，換上與舞台劇演員新女友梁皓恩（April）的合照。記者火速將新女起底，原來April不只參演舞台劇，更是索爆模特兒，早前為攝影師Jerry Ling拍攝了一輯火辣性感靚相，當中穿上喱士胸圍及T-Back大擺誘人甫士，意識相當大膽，令人想入非非！

梁皓恩曾以性感裝束拍攝寫真。	梁皓恩獲張致恒確立女友的地位。	莊端兒叮囑舊愛張致恒要愛錫女友。

亂認性上癮

Steven昨透過電話承認女友身份：「係女朋友，都係啱啱開始。（高調放閃？）想畀個身份女朋友，希望畀到安全感佢，都知自己個底太花，同埋真係修心養性要乖仔。」並直言視對方為結婚對象：「唔想畀人感覺好花弗，每次拍拖都朝着呢個目標進發，中途發生咩意外都估計唔到，當然我都要做好自己，講咩都冇用，想用行動話畀大家聽，我係有改變嘅。（會閃婚？）唔排除呢個可能。（點識？）日前朋友邀請我去睇舞台劇，佢有份做，之後就交換電話同傾偈。」Steven又澄清沒有「性上癮」說：「當日記者問時我太心急亂講，想將責任賴落個病度，其實我冇呢個病。」

身為舊愛的Xenia昨日在電話叮囑Steven要愛錫女友：「當然送上祝福，開心事嚟。（叫佢生性？）都咁大個仔，要努力做好自己，女仔用嚟錫嘅。（佢話唔排除閃婚？）緣分嘅嘢話唔埋，希望佢成事。」

文：音樂組