吳婉芳昨日發聲明證實丈夫胡家驊於睡夢中辭世，胡家驊生前有不少圈內外朋友，朋友們對於他的離開大感不捨，感慨他是位好好先生。
「呢啲事發生實會有唔開心，大家畀啲空間佢（吳婉芳），等佢同家人度過最艱難嘅時期。佢依家需要同屋企人一齊，如果佢有需要，一定會陪喺佢身邊。我哋20號仲有出嚟飲茶，當時胡家驊冇嚟，但吳婉芳就冇乜異樣。我哋成日都有飯敍，不時見吓面。胡家驊份人好好，好幽默，可能佢由細喺英國長大，有紳士風度，份人冇乜架子，印象最深刻係佢着衫有品味。佢係一位好好先生，圈內外都有朋友，呢件事令我覺得健康重要。」
名媛林李婉冰於1995年與胡家驊一同擔任東華三院總理，她表示多年來一直有保持聯絡，與吳婉芳比較熟，她謂星期一還與對方傾過電話，主要傾小朋友，當時完全冇迹象有任何事，應該走得突然，但覺得胡家驊近年消瘦不少，她不想在此時打擾吳婉芳，暫時還未慰問她。
胡家驊的愛駒有不少養在告東尼馬房，所以告東尼與太太Pauline及胡家驊夫婦感情甚佳，Pauline電話中透露最後一次見胡家驊是19日於馬場，當時還與胡家驊及吳婉芳傾偈，完全不覺胡家驊有異樣，覺得他精神不俗，她說：「聽到呢個消息真係非常突然，完全接受唔到，係不能置信！都有WhatsApp問候吳婉芳，希望佢唔好咁傷心，心情可快啲平復。」
前亞姐羅霖早年除夕常與胡家驊及吳婉芳一同參加除夕派對，對於胡家驊猝逝，她表現傷感：「人生真係無常，覺得突然同震驚，健康非常重要，希望佢家人節哀！」
名人馬清揚與胡家驊識於少年時，他說：「佢離世消息，覺得突然，咁後生，我哋細個成日一齊打波、去派對，同佢嘅回憶都係開心，佢係開心嘅人。最後一次見佢喺兩、三個月前左右，當時冇覺得佢有唔舒服，都幾精神，係瘦咗啲。（佢鍾意摸吓酒杯底？）咁大家食飯開心都會飲吓，但當然唔係話飲得好犀利！佢個人好好客，人好好，又隨和！（有冇聯絡佢屋企人？）有打電話畀佢哋，但全部都冇聽電話。」他又透露會出席喪禮。