盧頌之大肚寫真晒溫馨！
大隻仔趙勁皓（King）與另一半盧頌之（DaDa），下月即將榮升爹哋、媽咪，阿King趁DaDa臨盆在即，專誠帶她拍攝一輯「半裸大肚寫真」，勁晒靚靚Body，慶祝情人節之餘，亦為一家三口留下美好回憶！
模特兒出身的趙勁皓與盧頌之早前以拍攝「半裸大肚寫真」來慶祝情人節，相中阿King勁晒完美Body，更用無敵麒麟臂將DaDa攬到實一實，照片既溫馨又激情！而臨盆在即的DaDa肚子雖已「籮咁大」，但依然面尖尖，顏值更勝往昔！
心態上未夠成熟
阿King笑言未完全Ready做爹哋：「要買嘅嘢，都準備得七七八八，醫生、陪月都Book好晒，但心態上仲覺得自己未夠成熟，見到DaDa個肚愈來愈大，我壓力亦愈來愈大，驚照顧得佢哋唔夠好。（點解影呢輯相？）今次嘅主角係DaDa，揀情人節影相係因為我哋一向好少慶祝情人節，咁既然2月影相，不如情人節影相加食飯慶祝啦！」
鬥快清潔狗便便
近日阿King忙於自編自導電影，又要打理酒吧、食肆、健身中心生意，自己雖然不夠瞓，仍一有空即為DaDa按摩，他說：「我仲會幫手照顧屋企啲狗狗，清潔佢哋嘅大、小便，我要同DaDa鬥快，等佢唔使咁操勞！（結婚籌備成點？）註咗冊先再構思婚宴，想同B女嘅百日宴一齊搞。」
文：影視組