李佳芯私藏無價寶 養父母拒貼仔
無綫藝人李佳芯無論名氣或收入都比男友ViuTV主持陳炳銓高，難怪被影到用車載男友，食飯她埋單，女尊男卑，更被指「包養」男友，但李佳芯揚言：「自己都未養得起，排隊都未到男友！」
近期備受無綫力捧的李佳芯被稱為新一代「宅男女神」，連感情都要低調，不敢認拍拖的她，卻又多次被影到與「男友」陳炳銓出雙入對，除揸車載對方回家外，二人食飯女方埋單，隨即被指包養男友。李佳芯昨日出席珠寶展發布會，被問到有關包養男友問題，她說：「我自己都未養得到，依家只係有瓦遮頭，我好鍾意食，所以未養到人，如果以排隊計，都係父母要養先，點都未輪到男友。」又笑言可能有劇出街，當做宣傳。
經濟冇距離
問到可介意男友窮？李佳芯說：「基本經濟同思維大家都要咁上下，大家水平唔好相距太大。（男友睇完會否唔開心？）換轉係我都唔開心，不過大家識分真定假，可能我冇咩新聞畀人講，屋企人都有問起，但佢哋知我唔係呢類人。」對於最近有拜金女揚言有2,000呎樓先會嫁，李佳芯說：「用呢樣嘢做條件去維繫好唔得，大家住埋同一間屋，唔夾都冇意思，靠自己能力，應該唔會瞓街。」
家傳玉戒指
李佳芯昨日擔任模特兒，分別戴上兩套名貴首飾，她指女人都鍾意珠寶，自己都有珍藏，當中更有無價寶：「我好鍾意玉，雖然畀人感覺老氣，但有收藏古玉。（最貴幾錢？）係爺爺、嫲嫲畀我嘅玉戒指，對我嚟講係無價寶，手工好精緻，依家買唔到。」
文：名人組