軒仔擬暫別樂壇進修音樂
張敬軒與王菀之（Ivana）前晚舉行尾場紅館演唱會，軒仔被歌迷稱做「軒叔」十分感慨，遂拖前來捧場的容祖兒落水：「咁容祖兒應該嗌佢咩呢，容姨？」個唱結束後，有消息指軒仔將暫別樂壇去讀書，其經理人表示如果落實，軒仔會去進修音樂。
歌手張敬軒與王菀之（Ivana）一連四場在紅館舉行的《The Magical Teeter Totter演唱會2017》前晚尾場，容祖兒、汪明荃、黃秋生、楊受成夫婦等捧場。軒仔獨唱完《等》及《櫻花樹下》後，感慨自己已變前輩歌手，歌迷即叫他「軒叔」，他笑說：「『軒叔』你哋嗌o架咩？一出道大家叫我『軒仔』，依家叫『軒叔』，咁容祖兒應該嗌佢咩呢？容姨？」逗得全場大笑！
擔心冇歌迷捧場
兩人在尾場亦大講心底話，軒仔表示一個月前因《歌手》風波而出現在各媒體，曾擔心沒人來看其演出，故特別多謝這幾晚來睇演唱會的朋友：「我同你哋一樣，都係生活喺繁忙工作中嘅人，一樣有高有低。作為歌手要身體力行，所以遇到困難，我決定努力寫同唱更多好歌報答大家。」獲得全場掌聲！
笑王菀之136磅
玩搖搖板時軒仔說覺得Ivana重了，還叫觀眾猜兩人的體重，Ivana指綵排時兩人都是136磅，軒仔即笑說：「冇見過女仔136磅！」Ivana即叫現場有136磅的女士拍手，結果有很多人和應。
而Ivana自彈自唱後亦大講肺腑之言：「我知軒仔唔鍾意我咁講，但我知呢四場演唱會大部分係佢嘅歌迷，唔緊要，我都好開心。由出道到依家我嘅歌迷都唔多，但好多謝我嘅歌迷咁有耐性去了解我嘅音樂。」期間不禁落淚。
受訪時，Ivana謂這次為博軒仔「紅顏一笑」，才搏命跳辣身舞，軒仔表示收貨，又透露Ivana因舊患及練舞受傷，要戴腰封演出。演唱會結束後，有消息指軒仔在第二場演出時在台上曾表示將會暫別樂壇去讀書，對此，軒仔的經理人回覆：「軒仔係喺台上提過有計劃，但未作詳細安排，如果落實會進修音樂。」
攝：司徒國榮
文：音樂組