鄭俊弘昔日對手變摯友
藝人鄭俊弘、胡蓓蔚、林曉培及譚嘉儀等前晚為《2016年度TVB全球華人新秀歌唱大賽》站台，主持胡蓓蔚大晒3吋事業線，笑說：「試裙嗰時冇呢個效果(口架)！（老公批准？）佢畀好高自由度我，從來唔過問我去街或者同邊個去。（咁你管佢？）咁大個人知道自己做緊乜，我反而想佢去多啲街，佢好黐家，坐喺屋企有嘢食、有遙控器、有電話同電腦就得。」
至於歌唱比賽出身的鄭俊弘大讚今屆參賽者水準高：「但每位參賽者得分幾鐘時間表演，最緊要唔好緊張，享受舞台感覺。」他又自爆當年參賽趣事：「我唔識寫中文，又唔知問邊個，填參賽歌曲時淨係識寫《他的女人》。」並透露事隔16年仍與當年其他參賽者保持聯絡：「最近先話遲啲約唱K，佢哋又會自動波買我嘅唱片，比賽得嚟嘅友誼好珍貴！」而前晚的比賽最終由周奕斌奪金獎，施勤及伍富橋則分別奪得銀獎及銅獎。
