福將Bobby省招牌玩「喜」宋仲基

無綫近年受到網絡媒體衝擊與觀眾睇電視習慣改變，劇集收視難免受影響，但免費電視之爭卻愈見劇烈，繼現有的ViuTV後，有線電視旗下的免費電視「奇妙電視」將於5月加入戰團，並製作電視劇搶灘。為鞏固電視王國地位，加上適逢今年是台慶50周年，無綫決定不惜工本投資逾5,000萬元，繼2007年《歲月風雲》後再拍50集長劇《誇世代》，更破格地選取輕鬆喜劇為題材，並召回「福將」歐陽震華（Bobby）孭飛，誓要省靚無綫金漆招牌。

叫吳業坤做Seven

被選為50周年台慶劇的《誇》劇昨日晒冷拜神，出席演員逾70人夠「戲」勢，包括Bobby、田蕊妮、陳豪、李佳芯、張繼聰、邵美琪等，劇集以銀行為故事背景。「福將」Bobby今次飾演的角色名與韓國人氣男星宋仲基相同，他拍照時還學埋這位Oppa擺出心心甫士，未開拍已經笑爆全場！Bobby劇中還會與吳業坤「靈魂交換」，扮演對方時不忘重現其眼鏡霧化的經典畫面。開工前，Bobby先整蠱吳業坤，幫他起花名「Seven」！

演「宋仲基」的Bobby擺出心心手勢，攞命囉……	你邊忽似Oppa？（設計對白）	麥明詩（左）指戲中被陳嘉寶搶走男友，勾起當年陰影。

Bobby在劇中與「視后」田蕊妮首次合作飾演夫妻，阿田幽Bobby一默：「佢係我由細睇到大嘅偶像！」問到有否親熱戲？Bobby即爆料：「佢第一集已經撩我去做『夫妻運動』。」講到角色「宋仲基」的由來，Bobby自言曾向監製提議不如叫崔智友：「監製話女仔名嚟，咁不如做佢大佬『崔智冇』。」問到可會擔心宋仲基的粉絲反對，他笑說：「最多暗殺我啫！其實我唔係醜化，有我做宋仲基，咪顯得真嗰個更加英俊。」據知無綫錫住Bobby，承諾會讓他有時間休息，保持最佳狀態。至於被指「Seven」的吳業坤接受電話訪問時坦言沒有不快：「唔會！知道大家開玩笑，等大家熟落啲，咁樣玩吓幾開心！」

田蕊妮話細細個就睇Bobby，好寸喎！	Bobby會與吳業坤交換身份，即場戴副粗框眼鏡試扮對方。	放大圖片

麥明詩被搶男友

有份參演的「十優港姐」麥明詩現實緋聞不絕，但戲中卻飾演缺乏自信的角色，還被好姊妹陳嘉寶搶男友，她說：「又唔係好相反，每個人都有自信同埋冇自信嘅一面，今次攞出冇自信一面去演繹角色。」麥明詩坦言小時候曾被搶走男友，但沒有撬過人牆腳。講到被爆用交友App識男仔？麥明詩說：「Download嚟玩吓啫！都係睇吓人哋啲相，冇真係玩。」

文：影視組