林盛斌擁10個物業繼續掃舖
藝人林盛斌（Bob）近年工作量大增，財源自然滾滾來。為家中「4條Queen」日後生活鋪路，投資有道的他落重注入市買磚頭，至今手持起碼10個物業，身家近半億躋身圈中隱形富豪之列！日前他再被發現到旺角「巡舖」，似乎有意再入市，他回應時笑謂：「睇吓啫，買樓唔同買舖，當自己學多樣嘢都好。」
Bob搞笑形象相當入屋，近年隨着知名度及工作量提升，身為「愛家號」的他銀包腫脹即靜極思動，密密在樓市方面出手，為太太及3個囡囡日後生活積穀防飢，其物業市值至今估計已近半億，難怪他早前受訪已明言：「每個女我都已經準備咗層樓畀佢哋做嫁妝喇。」
孖老闆娘講地產經
據記者翻查土地註冊署資料顯示，Bob與太太Pearl Wong聯名或各自擁有物業包括「成名發迹地」旺角仁安大廈兩個分別600多及900多呎的單位外，更於深水埗及長沙灣一帶「狂掃」至少6個住宅，加上兩個小型寫字樓及商業大廈單位，二人至少手持10個物業，名副其實投資有道！
日前Bob被發現與助手揸車前往旺角，泊好車後他一支箭步入附近一間地產公司，隨即與地產經紀雞啄唔斷，未幾眾人更陪Bob移步到後巷煲煙繼續吹水。隨後Bob等往廣華街一帶「巡舖」，只見Bob於店舖外行來行去視察環境，又拿出手機不斷拍照。當眾人「完事」後返回地產舖時，Bob竟於門外停低，與附近小食店的老闆娘大講「地產經」。
買股票輸幾十萬學精
事後記者致電Bob，問他是否有意再入市？他笑住答：「又有人報料呀？講起嚟都失禮，以前收入唔多，試過想錢搵錢走去學人買股票，結果眨吓眼輸咗幾十萬，自此之後我就同自己講，有錢買磚頭好過！嗰日係去學吓人睇舖位啫，買樓唔同買舖，要注意嘅細節好多，當自己學多樣嘢都好。（買樓買到半億身家喎。）邊有咁多？有啲係供斷咗，有啲都仲要揼錢落去嘅，仲要捱呀！」
文：影視組