丁子高「標心」千嬅80歲都未回魂！

女人有馭夫術，男人亦識冧妻功！貴為天后楊千嬅的「星級人夫」丁子高，佢嘅冧妻功力就練到爐火純青，兩人處於「七年之癢」關口，丁生完全不敢鬆懈，早排老婆生日，點會送包包、鑽石呢啲普通貨仔？呢啲物質嘢千嬅自己都大把啦，要送梗係要心思嘢，令老婆去到80歲時都回味當年老公送嘅難忘禮物。呢次丁生就挾咗千嬅飛去布吉慶生，揀咗海邊燭光晚餐撐枱腳，仲搬咗個「維港煙花匯」出嚟，最屈機係，呢幕幾萬蚊貨仔嘅煙花匯係「千嬅獨尊」嘅驚喜賀禮，名副其實係「高級爆閃」，千嬅當堂Sweet都暈，仲話呢鋪「公主都嚇到變番薯」！丁生最愛玩「外遊Surprise」，當年就帶千嬅去拉斯維加斯嚟個突搫求婚，仲即刻喺當地註冊結婚，丁生呢位「情趣老公」，我Nuts哥都要跟佢學嘢！

黃曉明講得出，肯定做得到

另外有種叫「土豪式」嘅愛妻術，我Nuts哥甘拜下風，呢種老公既要有型靚仔，仲要有錢、有面、有卡士，圈中發揮得淋漓盡致嘅，相信黃曉明認第二，都冇人認第一！佢出名錫老婆Angelababy錫到飛起「離晒地」，Baby一聲「我要做公主」，曉明隨手拋出幾個銀彈，打造出最有土豪味的世紀婚禮，動用嘅人力物力同請來嘅賓客，唔知仲以為搞國婚！只要Baby鍾意，就算要天上個月球，我諗呢位「離地老公」都會陪佢衝出太空登陸月球，何況航天科技一日千里，Baby奔月有幾奇？做得人老公，承諾嘅嘢又點少得，曉明當日講過將來Baby老到變阿婆都會係佢心目中嘅「小公主」，嘩！呢啲唔係「真心」又邊講到出口！Baby依家已經升呢變「AngelaMami」，再過三、四十年就係「AngelaMaMa」，當年飾演楊過嘅曉明最叻咩武功？咪就係「癡心情長劍」囉！

黃曉明玩「土豪式」浪漫，老婆Angelababy要乜有乜！	蘇永康去邊都同老婆做「糖黐豆」，見少陣都唔得！	丁子高冧妻功力超晒班，成功標走千嬅個心！

嫌佢哋太離地？「貼地」啲嘅，有人稱「阿公」嘅蘇永康，佢嘅冧妻大法，我Nuts哥將佢歸納埋「講心唔講金」類。咪誤會我話阿公唔夠富貴，阿公大把銀両，每季買衫錢都夠我Nuts哥去轉歐遊，阿公贏在男人老狗「玩黐身」！事關佢老婆Anita令呢位年近半百嘅阿公「老來得子」，早排見佢攬住老婆個「巨肚」影相，以為咩料？原來阿公要飛去拉斯維加斯做騷，要同兩母子分隔兩地，阿公一副難捨難離嘅樣，最冤氣係騷與騷之間兩日空檔，佢竟然飛越半個地球返香港，只為見老婆同個肚一面，呢種百分百「冤氣老公」，點會唔冧爆老婆？

發哥直情要攞「忠貞牌坊」

以前每當啲兄弟結婚，我Nuts哥就笑人哋「結婚係男人墳墓」，不過世界變啦！做男人最緊要「有擔當」嘛，娶得老婆，成頭家畀你揸手，做個擔得起嘅「好老公」，呢啲先Charm。能達到「神級人夫」指標，周潤發梗係圈中典範，發哥身家億億聲，財政、事業至經理人工作全部畀老婆陳薈蓮打晒骰，對住老婆永遠「Say Yes」，有時間就同老婆去周遊列國，又親自落廚玩吓煮飯仔。咪以為發哥年過60冇情趣，講浪漫細心，佢叻過你班(口靚)仔，知道老婆性格低調，生日就送盆紅蘿蔔小盆栽，氹得發嫂「冧滋滋」嗌感動。發哥做咗人夫30年，從未聽過有「丁點曳曳豬」嘅緋聞，古時有貞節牌坊畀女人，我Nuts哥覺得發哥30年嚟面對無數誘惑都不為所動，對發嫂嘅「忠貞度」，直情可以頒金紫荊勳章表揚！呢班「星級好老公」為老婆花招百出，搞到我Nuts哥下世都想做佢哋老婆呀！

Nuts哥