王君馨4月出嫁帶未婚夫返閨甜蜜開餐

「處女黨」成員之一王君馨（Grace）去年低調入紙申請註冊，與拍拖11年的圈外男友Daniel結束愛情長跑，Daniel更有意為另一半放棄美國的事業來港定居。雖然Grace近日對外宣稱婚禮日期未定，甚至有可能趕不及今年內舉行，但據知她將於4月拉埋天窗，未來老公Daniel近日更抽空來港陪伴佳人，讓女友可以寓拍拖於籌備婚禮。

等電梯雞啄唔斷

日前晚上，Grace被發現與Daniel乘的士返回女方位於將軍澳的香閨，Daniel落車時一袋二袋，其中包括大大袋的雪糕，似乎準備上樓甜蜜開餐。雖然Grace與Daniel拍拖逾十個寒暑，但仍有說不完的話題，戴情侶帽的兩人等電梯時雞啄唔斷，令一齊搭電梯的住客不禁眼望望。

兩人等電梯時雞啄唔斷，懶理住客眼望望。	據知王君馨將於四月與未婚夫拉埋天窗。	王君馨落力籌備婚禮，其首飾舖亦於馬來西亞開分店，真係忙到爆燈。

此外，Grace日前又被發現與近日合作新歌的鍾舒漫到銅鑼灣買衫、化妝品及結婚雜誌。兩女先到時裝店睇衫，一睇就睇足一粒鐘，期間兩人有傾有講，輪流拎起心頭好「埋鏡拼拼」，離開時更一袋二袋戰利品，收穫甚豐。之後兩女轉睇化妝品，雖然化妝品專櫃人來人往，但她們企定專心聽售貨員講解，誓做最美新娘的Grace更伸出玉手試化妝品。之後兩女再轉到大型書店，雖然Grace手上已經拎着剛才買的化妝品，但仍手捧兩大本婚禮及時裝雜誌不停揭，希望從中取經，套用到自己的婚禮上。

王君馨拎住結婚雜誌不停揭，鍾舒漫亦有畀意見。	女士天生愛買衫，可以睇足一粒鐘都唔覺攰。	兩人細心聆聽售貨員講解化妝品。

飛馬國開分店

記者就正式婚期及是否到美國舉行婚禮致電Grace，她說：「仲有好多嘢計劃中，婚禮可能喺香港搞，但要搵個合心水又適合嘅地方好困難，冇咁快，仲有好多嘢籌備同要諗點搞，努力中。（會唔會唔聲唔聲情人節結婚？）我應該唔會抄李亞男喺情人節結婚，因為我情人節會去馬來西亞開首飾舖嘅分店。」

攝：追蹤組

文：影視組