張振朗「為民除害」蔡思貝停電
藝人蔡思貝前晚與近日傳緋聞的張振朗拍劇，思貝誓神劈願話如與對方譜戀曲，即變男人！張振朗聞言反窒思貝說：「佢咁講就好，為民除害！」
蔡思貝、張振朗、王浩信、李佳芯及林韋辰等藝人，前晚到西營盤為無綫新劇《踩過界》拍攝外景，被指向張振朗放電的思貝，與振朗一同受訪，她故意全程擰歪面！
哨牙妹多咗「Follow牙s」
思貝解釋擰歪面有原因，她說：「費事一對望，又話我電佢呀！其實我哋戲入面嘅關係，就好似洪永城同黃翠如，所以好易被誤會友情係姣情。（振朗嫌棄你哨牙造型？）自從我戴咗呢個哨牙，不知多咗幾多『Follow牙s』！（咁有冇機會發展？）如果我同張振朗嘅話，我變男人，完全冇可能呀！其實電力同友善係一線之差啫。」
王浩信連冧兩情人
張振朗聞言即啟動反窒Mode，他說：「蔡思貝咁講就好，為民除害！（傳你幫佢吹沙？）唔係吹沙，係見佢眼有嘢，攞紙巾同佢抹啫。（上次見思貝用橙裝胸拍出水芙蓉，有咩感覺？）我成個腦都係橙同埋佢棚哨牙，不過，都慣咗佢個哨牙樣。（冇哨牙即刻OK晒？）仲大鑊！有哨牙已經增添色彩。（緋聞女友陳芷尤有冇問你同思貝搞乜？）冇，我同思貝只係似兩兄弟喺度玩，正常人都知冇嘢，好朋友有信心。」
王浩信則說不信蔡思貝與張振朗的緋聞，他說：「我作為旁人眼中睇，佢兩個似兄弟多啲！（元宵同情人節，會同老婆陳自瑤點慶祝？）我買咗禮物，今年買多兩份，個女都有，佢係我前世情人，我終於明白點解生女會冧，就係呢個道理。」
文：影視組