「筋傷一定要休息」李家鼎勸唔好亂按摩
因主持節目《阿爺廚房》而人氣急升的李家鼎昨日出席街市活動，被問到謝霆鋒因煮食導致手筋勞損，他說：「都會呀，特別拋鑊，因為煮食過程手(爭)同手掌都要好用力，要用手腕力。（試過有手患？）托賴冇，但成日畀油彈到。（因為有功夫底頂住？）佢（霆鋒）都有學功夫㗎，其實睇每人煮嘢習慣。（霆鋒手筋發炎喎。）我建議佢筋傷咗一定要休息，冇咩其他方法，好似人攰咗都要瞓覺啦，反而唔好亂按摩，輕輕掃吓就算。」
對於霆鋒表示一日食一、兩排止痛丸，李家鼎說：「佢每日食一、兩排梗係唔好，對胃唔好嘛，胃一定受損，其實大家各師各法，江湖救急咪食囉，長期唔好。」他表示自己以往策騎發生意外時，曾需要食止痛藥，但都要睇跌打去瘀，又指：「骨有事就最好睇西醫。」提到霍汶希指藝人衛詩雅想拜他為師，李家鼎對此說：「冇所謂，咪合作吓。（佢係靚女！）靚唔靚冇所謂，都係煮餸啫。」
同場的徐榮一家四口溫馨現身，問到如何慶祝元宵？他透露會親自包湯圓，但囝囝徐朗竟「投訴」沒吃過爸爸整的湯圓。
