霆鋒拋鑊3年「黐晒筋」日啪兩排止痛藥

謝霆鋒近年除了全方位發展演藝工作，同時在多個行業作投資，收穫豐富，當中要數最狂熱的，莫過於他對下廚的熱愛。霆鋒近年主理的真人騷節目《12道鋒味》一連三季大受歡迎，更請來父親謝賢以及眾多名人明星亮相節目，又建立屬於自己的食品品牌，並獲得米芝蓮百年以來頒發第一個「米芝蓮之友」榮譽，成為觀眾心中的「型男廚神」！

呻痛過牙痛 醫生禁煮切

不過，成功的背後代價不少，日前見他在社交網上載刮痧至半身通紅的照片，透露遭醫生告誡他不能再下廚，傷勢令人憂心。據知，霆鋒的痛症已持續一段時間，由手臂開始，漸漸影響肩、頸等部位，初時透過中醫治理，亦嘗試跌打及按摩紓緩痛症，但痛楚仍日漸加劇。霆鋒最後入院接受磁力共振檢查後，發現患上筋膜炎，原因是他長期用右手快速切菜、拋鑊所致。

英皇高層霍汶希（Mani）前晚與衛詩雅於銅鑼灣出席英皇電影《決戰食神》慈善首映禮，Mani透露：「佢啲筋黐埋發炎，一般廚師多年鑽研先咁，佢煮飯三年就黐咗條筋，變『黐筋』！佢一日食一、兩排止痛丸都唔得，我哋同佢照咗機，骨科神醫話唯一方法係唔好切嘢同煮嘢。（佢冇得煮嘢好傷心？）佢好傷心。（影響工作？）佢煮唔到飯，佢本身研究緊產品。（霆鋒聽唔聽話？）唔係聽唔聽話，係根本做唔到，佢話痛過牙痛。」Mani又指有荷里活動作片邀請霆鋒參演，但要視乎他的傷勢進展，她說：「霆鋒都話估唔到打到飛起都冇事，反而煮到有事。」

受痛症影響，霆鋒多個工作計劃都未必能如期拍攝，當中要數《12道鋒味》第四季影響最大，該節目三季以來均是浙江衛視的王牌節目，收視穩佔三甲，獲安排於黃金時段播放，甚受廣告商歡迎，獲得不少贊助。第四季目前已在籌備當中，節目一旦延期，會涉及數億元人民幣損失，英皇方面正與浙江衛視密切聯繫，希望能盡快為節目作出最新安排。而霆鋒目前正忙於為新片《決》展開為期17日的全國宣傳，之後將飛抵西班牙拍攝廣告，這段日子當作休息。

謝賢唔知情 指兒子口硬

霆鋒父親謝賢接受訪問，對於霆鋒受傷的消息坦言毫不知情，他說：「係咩？大家都知佢性格啦，乜都唔會講嘅！（覺得心痛？）冇得咁講，做得呢啲預咗會有傷有損，我只係希望佢能夠小心啲。依家競爭咁大，梗係要做多啲，相信佢冇問題嘅，等我都打電話問候吓佢。」

文：影視組