(火羅)爆情人甄澤權反擊陳嘉寶
魔術師甄澤權（Louis）與藝人陳嘉寶（Anjaylia）因合作《街頭魔法王2》而成為師徒，這對無所不談的師徒趁住情人節，相約整心形朱古力，然後各自送給另一半，Louis自爆廚藝欠佳，試過為女朋友下廚，結果煎燶豬扒，更踢爆Anjaylia才是一個sweet好情人！
Anjaylia近日被拍得背住富貴男友黃頌祈與才子林皓霆約會，男友即緊張追上廣州陪她，男友識做，Anjaylia當然心甜。趁住情人節，她相約師傅Louis齊齊整心心朱古力。Anjaylia自言試過為很多朋友下廚，最叻整醉鴨舌，至於送甚麼情人節禮物給男友？她就大賣關子：「未諗喎，師傅可唔可以變走情人節？」
模仿愛的呼喚
Louis就謙稱不是浪漫情人，自言把很多時間花在魔術上，所以廚藝一般，但都有試過為女朋友煮情人節大餐，他笑說：「好難食，啲豬扒燶晒，條腸又紅色，食完內心好開心，但個肚就唔舒服。」此時Anjaylia即踢爆Louis對另一半很溫柔，隨即扮師傅用溫柔語氣「愛的呼喚」，又模仿師傅的柔情眼神，令Louis哭笑不得，繼而還擊踢爆Anjaylia：「聽佢啲朋友講，佢好好o架，好sweet！」Anjaylia緊張反問：「邊個朋友？係咪Grace（陳凱琳）？」Louis即笑而不語。
紅館做魔術騷
講到廚藝，Louis信心不足，但講到魔術，他就滿肚子密圈，想今年踏上紅館舞台，他說：「但好多問題要克服，紅館四面台，如果做到四面台就最好，但360度表演又好難，問題要一步步克服。」嘉賓方面，他當然預了位置給徒弟Anjaylia，她對此亦期待萬分。
文：李惠儀
攝：吳文聰