MLTR一聽鍾情吻別學友

「Baby won't you tell me why……」丹麥樂隊MLTR的歌曲《That's Why（You Go Away）》當年因成為無綫劇《壹號皇庭Ⅴ》插曲而唱到街知巷聞，早前他們來港宣傳今年8月於九龍灣國際展貿中心舉行的演唱會，鼓手Kare Wanscher受訪時說：「我哋嚟香港宣傳同開騷已經有6、7次，對上一次係2004年，香港係一路建設緊嘅城市，好有未來科幻感。」結他手Mikkel Lentz則表示會為港騷加入中華元素，問到會否唱中文歌，他即大賣關子：「仲有6個月，睇吓到時點啦！」

談及歌曲《That's Why（You Go Away）》，主音Jascha Richter透露創作該曲前有3天時間沒有靈感，然後突然順利寫了出來，是神奇的體驗！談及2003年，MLTR將張學友名曲《吻別》翻唱成《Take Me To Your Heart》，Mikkel說：「當時我哋大碟需要一首情歌，香港唱片公司有人將《吻別》寄去哥本哈根畀我哋聽，我哋一聽就愛上個旋律，但唔明歌詞，於是決定寫個英文版。」

張學友	MLTR與香港女歌手Phoebe合唱，雙方已經很Friend。

焗改名攻英國市場

問到樂隊為何有一段時間只叫簡稱，Kare笑說：「當時我哋喺亞洲同歐洲好紅，但打唔入英國市場，英國唱片公司嘅人幫我哋宣傳時，就話我哋樂隊名好白癡，不如簡稱MLR，佢哋當正成個世界得英國咁！我哋話其他地方唔係咁叫我哋喎，至少都叫MLTR啦！之後慢慢先用番原名。」Jascha補充：「其實有兩個名都好，依家社交網站Hashtag標籤大部分都係寫MLTR。」

此外，他們早前與香港女新人楊斯捷（Phoebe）合唱新版《Eternal Love》，Phoebe坦言感榮幸：「好正，新人嚟講有咁嘅機會好難得，首歌有兩個版本，中英合唱同全英文版。」

文：外娛組