黎耀祥想娶混血新抱
藝人黎耀祥、賴慰玲及何廣沛等昨日出席賀歲劇《財神駕到》新春開年飯，提到周二的收視達27.3點，問祥仔會否期望結局收視達30點？他老實說：「難啲喎！呢個時段28、29點都好厲害啦！」農曆新年期間他到美加登台，共逗留10天，問到留美的囝囝可有帶金髮女郎見他？祥仔笑稱：「佢未有咁長進，我都想撈一撈呀，有人叫聲『father』。混血都幾靚，我哋黎家一直都冇混血，試吓都好。」
何廣沛在劇中戲份重，但他不滿自己演得不夠好：「呢套係第一套有咁多戲份嘅劇，成個人慌晒，拍嗰時成舊飯咁。」賴慰玲在過年前搬屋，新年就執好屋等好姊妹陳瀅、陳嘉寶及陳凱琳等團拜，問到有冇賭錢？她說：「陳凱琳好想打麻雀，但係我哋傾偈傾夜咗，怕太夜會嘈到人所以冇打。」