李嘉欣撐許晉亨後生：心境似40幾！
李嘉欣近日喜事重重，除了前晚老公許晉亨愛駒拉頭馬攞彩外，老公與囝囝Jayden均是二月壽星。她在活動中不停放閃晒恩愛，更賣口乖讚快將55歲的老公後生：「佢似40幾！」
李嘉欣與林嘉欣昨日現身樂富商場舉行的「#Linkemoji愛‧FUN‧享」慈善企劃開幕禮，兩人在現場玩大型夾emoji公仔機，之後又玩自拍，場面熱鬧。李嘉欣去年聖誕節到札幌滑雪遇正大風雪，被困機場4日，如此慘痛經歷卻沒被嚇怕，初三她再與家人同遊此地，她說：「今次順利好多，喺嗰度跌底就係番嗰度起身。」
李嘉欣囝囝前日6歲生日，她透露囝囝生日沒有特別搞派對，一家人慶祝已很開心。提到本月25日是許晉亨55歲生日，李嘉欣竟然忘記老公歲數，更驚訝地說：「我真係唔記得佢幾歲同埋幾時生日，估唔到係呢個歲數！佢心境或思想都唔似，似40幾歲。（40幾歲好多女人埋身，驚唔驚？）唔驚，我哋都結咗婚10年。（會唔會大搞55歲生日？）快啲刪除咗個數字，我諗佢唔鍾意提到呢個數字，唔會大搞。」她又稱情人節老公要工幹，所以已約好朋友外遊。
心中富有 暗寸大劉
另外，李嘉欣舊愛劉鑾雄早前將旗下物業「The ONE」送贈老婆甘比，嘉欣稱好忙，所以冇留意報道。提到甘比身家因而跳升逾400億變成香港女首富，嘉欣即暗寸：「心中富有係最緊要，咁係好事。」對於之前一直將她與「The ONE」扯上關係，李嘉欣保持笑容說：「你依家講我先知，自己好忙，所以都冇留意其他人嘅新聞。」
林嘉欣透露新年留港過年，年初五與媽咪及兩個囡囡到沖繩旅行。問到老公為何沒有同行？她笑說：「佢話全部都係女人，唔去。（你自己照顧兩個女唔辛苦？）慣咗，有啲嘢要放手畀啲機會小朋友做，家姐見到我拖住個妹，咁佢會幫手推行李。」
文：名人組