詩詠「好女友光環」射穿牆洪永城走得出烽火大地 逃唔過情網殺機

唔想被DQ？焗變「唐永城」

點解？做唐詩詠身邊嘅男人真係好難！就係因為唐詩詠有太多至高無上嘅光環，誇張到佢抖啖大氣或放個屁都零舍香，相反做佢嘅男人唔單止外貌收入家底，仲要通過人格審查。好多人話洪永城襯唔起唐詩詠，又猛質點解唔要馬國明。查實洪永城究竟真正衰乜呢？唔通就係口才好條脷識轉彎，同埋個樣花弗啲？口多多都係罪？拉人封艇都要講證據啦！咁耐以嚟，真係有圖有真相影到佢去偷食？

要符合大家嘅期望，唔想被DQ，咁就要做有晒三從四德嘅「唐永城」喇！【一】：禁絕同所有異性埋身及笑容眼神交流，黑口黑面，保持口臭最佳，最好有埋金仔嘅高射炮，邊個女仔埋身，射呀射，射她吧！【二】：24小時當48小時用，話之你開工踩足廿個鐘，都要陪女友見吓面食碗麵，連覺都唔瞓就最啱！唐詩詠單拖食麵甚至同朋友去睇Big Bang，因為洪永城開工唔得閒，咪衰咗囉！畀人話冷落女友吵大鑊搞到冷戰！【三】：玩社交網畀Like唔可以亂畀，朋友唔可以亂add，要查家宅同睇三世書，總之逢女必Out！只可以Post女友合照或HeHe照，一Post同異性合照？死得啦！早排畀人搵到同舊愛Bird合照，即刻畀人話翻撻！【四】：手拖手勿亂走，唔好玩前後腳呀！洪永城只要行先一步，而咁啱唐詩詠拎住一袋二袋，仲唔畀人話佢大男人當女友「阿四」！

做乜都錯？！話之你正印

之不過如果洪永城進化到陪玩陪飲陪食唔開工日日黐住唐詩詠，相信又有口痕友話佢不事生產食軟飯！利申，我Nuts哥唔係要幫洪永城漂白，只係覺得做佢都幾陰功甚至乎冇人生樂趣，簡直係求生不得，求死不能！做乜都畀人話對唔住唐詩詠之餘，明明有名有分係佢男友，但個個都叫你靠邊站，讓番個位畀馬國明喎！顏面何存呀？但如果洪永城真係「退位」分手，一定畀人鬧到貼地！係咪走過烽火大地零舍堅啲？我Nuts哥都幾佩服洪永城，就算畀人唔睇好，都難得頂到今時今日繼續同唐詩詠一齊！

都話男歡女愛係講化學作用，情路經歷多多嘅唐詩詠，其實係話畀大家聽，乜理想條件、乜嘢經歷全部都係假，相處開心自己鍾意就得啦！啲女士成日話好男人唔使一定靚仔有錢，有才華孝順上進（下刪1000字）就大把女埋身。嗱！你試吓着住套夢凸蕉踢對人字拖落蘭桂坊，走埋去一個喺冇合理辯解下、喺公眾地方藏有攻擊「性」胸器34C索女度，拎住杯Dry Martini畀個三七面Chok聲話佢聽：「我好上進o架，雖然依家年薪20萬，但我有才華，等吓啦，我信會有年薪百萬o架！」跟手再同佢講你好孝順，諗住聽朝同佢瞓醒一齊同阿媽飲早茶吖嗱！