Chilam送紮花靚靚開心過中六合彩

圈中模範夫婦張智霖(Chilam)和袁詠儀(靚靚)前日結婚十六周年,Chilam在慶祝飯局中當眾送上鮮花大派驚喜,令靚靚笑言感覺似中六合彩相當難得。問到Chilam有甚麼向太太講,他幽默表示:「叫佢慳啲啦!」

Chilam與靚靚人前人後相當恩愛,前日(8日)是結婚十六周年的大日子,兩人捨棄二人世界,反而孖住囝囝「魔童」及一班好友慶祝,當中包括伍詠薇夫婦、邱淑貞夫婦、蔡一智夫婦等。席間,「愛妻號」Chilam向太太驚喜送鮮花,並於心意卡寫上:「Dearest老婆,16上有您」,意指十六年來「一路上有你」,亦是兩公婆合演的真人騷節目名,相當有心思。靚靚在社交網分享喜悅,發文表示:「好驚喜!張先生竟然送花,真是開心得飛起來。謝謝見證我們16年的好朋友一起來慶祝,謝謝。」

「捱世界」前玩番晚

記者聯絡上Chilam,他笑言只送了花和卡給太太:「冇(口架)喇,係得呢啲,物輕情義重嘛。其實同朋友食餐飯,都唔係送咩驚喜,我又冇收埋紮花,佢嚟到咪送花畀佢囉。」他表示因為昨日要啟程到北京拍電影一個月,指當地天氣較差又寒冷,笑說:「我呢啲名副其實係去捱世界,所以出發前先出嚟玩番晚。」又指靚靚亦將抽空到當地探班。

反叫老公買少啲車

問到結婚十六年有甚麼說話向太太深情表白,Chilam幽默地說:「冇乜要講,叫佢慳啲啦!叫佢慳啲有好多意思,可以係慳啲啦,Baby。」身旁的靚靚即說:「慳啲喺唔同場合、唔同情況都有好多不同定義(口架)!我就會叫佢慳啲錢,唔好買咁多車,慳啲力水唔好成日出去玩。」對於老公送花,她開心地說:「好似中咗六合彩咁,咁多年來佢真係好少送花,好感動呀,冇諗過佢會送花,好難得。」而好友蔡一智、伍詠薇和李心潔等都有透過社交網發文送上祝福。

採:影視組

文:專案組