許廷鏗7月紅館騷 隨時益鄭俊弘
據知獲無綫一手栽培的星夢一哥許廷鏗（Alfred）年中約滿，星夢方面為挽留他續約而入紙紅館七月開騷，可惜卻難阻Alfred離巢之心，決意孖好友鄭欣宜自組公司。為填補紅館檔期，星夢鋪定路搵鄭俊弘頂上，又或考慮改開「星夢群星騷」。
憑無綫歌唱節目《超級巨聲》出身獲力捧的星夢一哥許廷鏗，近年屢傳約滿後離巢，去年底更傳他過檔華納，不過Alfred例牌否認。據知，Alfred與無綫經理人約及星夢唱片約，均於本年中同時屆滿，他決定另起爐灶，孖好友鄭欣宜自組公司捧自己。
搵群星撐場
身為星夢CEO的何哲圖（Herman）早已「聞到味」，去年中已開出紅館騷為條件利誘Alfred續約，可惜未能挽留對方離巢之心。據知，Herman現時相當頭痛，並做定兩手準備，如Alfred堅決離開，會將檔期留給鄭俊弘圓夢開處男紅館騷，但都要視乎其歌曲受歡迎程度，如未能達標，則將改開「星夢群星騷」。
外地度歲避談續約
記者昨日致電Alfred求證，身在外地旅遊的Alfred受訪說：「都回應過好多次喇，多謝大家關心我嘅去向，總之我呢刻仲同星夢履行合約中，我只係知公司一路都傾緊想幫我開騷，詳情仲傾緊。（已申請到七月紅館檔期？）真係唔知。」問到是否與欣宜開公司？抵死的他避談兼為對方的曲奇餅店宣傳說：「講緊曲奇餅？我淨係知道女神曲奇餅好賺錢咋。」而Herman被問到Alfred傳離巢，他說：「呢啲唔講住，等佢返嚟傾演出細節。（傾紅館騷？）日期、時間同地點未定。」
文：音樂組