陳凱琳磨拳擦掌摸爆肌嘉穎

藝人陳凱琳（Grace）和蕭正楠（Edwin）昨日於寶琳出席新年活動。問到農曆新年節目，Grace透露因男友鄭嘉穎新年不在港，故雙方家人早於年三十晚就食飯過節，稍後她亦會再拜訪嘉穎母親去拜年。

唔敢整甜品引誘

談到嘉穎日前表示要為舞台劇操肌，Grace笑言唔敢整甜品引誘男友：「佢冇預我一齊操肌，我唔整甜品引誘佢。（準備情人節禮物？）親自下廚煮中餐，之前整過煎釀三寶，但睇嚟要索晒油先畀佢食。」身旁的Edwin就指嘉穎本身已經好大隻：「佢本身都六舊腹肌，今次想增大肌肉，想好似鬼佬咁大隻。」問到Grace會否鍾情爆肌男？她笑言未摸過男友的腹肌：「佢今次係角色需要，但我冇摸過呀，等佢操晒先慢慢摸！」

蕭正楠：諗吓求婚

至於Edwin稱年初一已到女友黃翠如家拜年，又笑言心思思於今年結婚：「上去食糕玩狗，（被人催婚？）冇喎！（你之前話想2017年結婚？）我想之嘛， 2017一定得！不過開《深宮計》都要開半年。（開完工結婚剛剛好？）都要籌備嘛。」問到Edwin會否考慮情人節求婚？他稱可以考慮：「好提議！試吓諗吓！（你浪唔浪漫？）問翠如，我覺得自己好浪漫。（準備禮物未？）梗係有，重要日子，想死咩？大家夾時間，一餐飯都撞到嘅！」

蕭正楠自言好浪漫，但唔知翠如感唔感受到。

蕭正楠的粉絲舉晒紙牌撐偶像。

文：影視組