祖藍大把貨唔出「征」嘥咗索亞男

高瞻遠矚　提議劃「野戰區」

正所謂「有過痛苦，方知眾生痛苦」，唔係講我Nuts哥關心民間疾苦，係講緊身高只有163cm嘅王祖藍，佢雖然信主，但都一樣菩薩心腸，2012年佢就喺一個公開場合發表《王祖藍致香港政府收皮書》，人仔矮矮但高瞻遠矚，佢話：「鑑於好多嘅青少年人鍾意喺天橋底、樓梯間，嗰啲咁嘅地方打野戰，我建議康樂及文化事務處，以後就將郊野公園嘅一部分劃出嚟作野戰區，咁就非常之好，不過好多人想租用喎，你哋若然想租用嘅話，記得喺填表時候剔清楚，你係想去郊野公園，定係搞嘢公園喇！」

祖藍唔只早着先鞭，敢為天下先帶頭打郊野公園主意，更神預測咗香港之後數年嘅社會實況，包括：2014年有電視女藝員被發現與男伴在殘廁內gathering！（呢件事與去年底有港女喺台灣上引水產廁格內食鮑魚遙相呼應，有機會另文再講。）2015年有喺浸大、理大讀書嘅人士，喺何文田佛光街當街當巷打野戰，但佢哋係冇着迷彩衫o架吓！同年有由藝人轉任經理人嘅戴夢夢，被影到與男友Ricky雙雙去酒店，點知要房冇房，結果夢夢喺條街度，就地除裙！令佢嗰條大包圍阿婆底，盡收路人眼底。佢事後講番呢件事，仲話當時冇飲醉，「有時鬧情緒，會做出能人所不能嘅嘢！」要你心服口服咁服咗佢！去年則有青年新政游蕙禎鬼拍後尾枕，勿忘初「衝」，佢話：「我哋負擔唔起一層樓嘅租價，就算我哋要扑嘢，都搵唔到房去扑，呢個係好現實嘅問題嚟！」

浪費豪宅 造人要問經理人

又係嘅！時下要喺香港地買樓的確唔容易，「公屋新人王」吳業坤、「糖妹」黃山怡都曾經不約而同表示追唔切香港啲樓價。不過，其實上咗車都唔代表乜嘢，好似祖藍咁，佢2015年同李亞男結婚，仲買埋億元大屋，但早排兩公婆就慨嘆生B要同經理人預約。

唔係呀！耶穌收咗12門徒，祖藍就豪簽徐子珊、陳國邦、鄧萃雯等20粒星，喺坊間一片「市道唔好」嘅「喃嘸喃嘸」底下，佢竟然逆市大搞，足證佢真係矮仔多計、勁有辦法，搞乜生B反而要問經理人攞期？乜佢打算好似求婚嗰劑咁，公開搞兼夾玩埋直播咩？祖藍啱啱先喺內地節目同成龍玩完蜈蚣彈咋喎，目測都應該係好腰、好腎、好男人，三位一體！家陣講埋啲咁嘢，多多少少都係「長經理人志氣，減自己雄風！」點只嘥咗個靚老婆，嘥咗間億元大屋，嘥咗個情人節，直頭嘥埋佢個大鼻啦！仲唔快啲諗辦法，或者禱告，試吓交託畀主啦！